نشرت وزارة الداخلية عبر موقعها الرسمي، عددا من النصائح الهامة لسائقي المركبات على الطرق لتفادي الحوادث المرورية، وحفاظا على الأرواح والممتلكات جاءت كالآتي: "وانت سايق" (احتفظ بمسافة مناسبة بينك وبين اللى قدامك "4 أمتار لكل 10 كم سرعة". وخد بالك إن 30% من الحوادث بسبب عدم ترك مسافة الأمان).
"وانت سايق" (اجعل استخدامك للهاتف المحمول للضرورة) وخد بالك إن نسبة كبيرة من الحوادث سببها استخدام الهاتف المحمول.
لما تلاقى عربية طوارئ (إسعاف شرطة أو مطافئ) "وانت سايق" وسعلها الطريق وخد بالك إنها رايحة تنقذ مصاب أو تطفى حريق.
خد بالك إن السير بدون لوحات معدنية "مخالفة جسيمة" تضعك تحت طائلة القانون.
"وانت سايق" داخل المدينة متستخدمش الأنوار العالية وخد بالك (إنه ده بيمنع قائد السيارة في الاتجاه المعاكس من الرؤية تمامًا لمدة 7 ثوانى).
خد بالك إن إجراء الصيانات الدورية لعربيتك (هيحميك من حدوث أعطال مفاجئة، تكلفة تصليحها بيبقى أضعاف تكلفة الصيانة الدورية، ده غير إنك بتعطل الطريق).
خد بالك (لازم تزبط وضع المرايات الجانبية قبل ما تتحرك).
وإنت سايق.. لو عاوز تتخطى العربية اللى قدامك، تأكد أن شمالك فاضى وخد بالك إن التجاوز الخاطئ سبب أساسى في حوادث كثير.
وإنت سايق استخدم الإشارات الضوئية الجانبية قبل ما تدخل بالعربية يمين أو شمال (وخد بالك إن ده لازم يبقى بوقت كاف لتنبيه العربية اللى وراك).
خد بالك وإنت سايق في أوقات "سوء الأحوال الجوية" (هدى السرعة – حافظ على التهوية داخل العربية عشان الشبورة- تأكد من كفاءة مساحة الزجاج استخدم أضواء العربية للتنبيه وقت الضباب).
