تستغيث فايزة التى تبلغ من العمر، ٢٩ عاما، بوزيرة الصحة الدكتورة هالة زايد وكافة المسئولين فى وزارة الصحة، علاجها من مرض السرطان، تقول: «أنا ليا ٣ سنين بتعالج، عندى سرطان فى الغدة الليمفاوية على الرئتين، تم تشخيصى فى المعهد القومى بالقاهرة، أخذت كيماوى جرعتين هناك، وبعد كده حولت علاجى على سوهاج علشان المصاريف؛ لأنى بعت كل اللى عندى بسبب المصاريف هناك، كنت مقيمة فى فندق ومواصلات ومفيش فلوس، فضلت مستمرة على العلاج بتاع المعهد القومى، كانت النسبة بتقل، وكان العلاج جايب نتيجة كويسة، بعد كدا حصل حمل وتم تغيير العلاج هنا فى معهد أورام سوهاج، وبعد ما أخذت العلاج نفس النظام أخذت كام جرعة وعملت تحليل لقيت النسبة فى زيادة، بعد كدا أخذت كيماوى وتم حجزى فى المستشفى لمدة عشرة أيام، كل جرعة بخمسة أيام، وبعد كدا عملت التحليل تانى لقيت النسبة فى زيادة، واللى قالهولى إن العلاج مكلف وبيوصل إلى ٥٠ ألف جنيه، خاصة وأنا لا أعمل وليس لدى أى مصدر رزق أستطيع منه توفير العلاج على نفقتى.
واختتمت حديثها: «مش عارفة ممكن أوصل لفين عايزة علاج فحالتى تتدهور، وبقاوم عشان عندى ولاد عايزة أعيش عشانهم، لكن بدأت أفقد السيطرة لأن الألم الجسمانى أكبر من قدرتى على التحمل، وأناشد وزيرة الصحه الدكتورة هالة زايد ببحث حالتى فى العلاج فى أسرع وقت ممكن نظرا لتدهور حالتى.
للتواصل مع الحالة: ٠١٠٦٨٤٤٧٥٧٢
