فى جلسة فى احد مقاهى وسط البلد التى تدار منها كل امور النشطاء السياسين . فعلى تلك المقاهى تعقد الصفقات والاتفاقات ويتم توزيع المال السياسى كل حسب قدرته على حشد أكبر عدد من الشباب والشابات واصبحت الثورية تجارة مربحة فأغلب من يجلسون على تلك المقاهى لا عمل لهم الا النشاط السياسى وكلما زادت الاحداث سخونة كلما زاد عدد رواد المقاهى، فمن يريد عمل مسيرة او وقفة احتجاجية أو حتى اشتباك مع الشرطة فعليه الذهاب الى وسط البلد للاتفاق والدفع مقدما، يحدث هذا على مرأى ومسمع من الجميع وهناك اناس معروفون بالاسم يستأجرون لقدرتهم على الحشد . نظرت حولى فوجدت مجموعه من النشطاء اعرفهم جيدا فأنا بنت ثورة 25_30 ودار بيننا هذا الحوار ولكم الحكم ..هتنزل ليه بكره يا أ ع.. احنا عايزين نرجع حق الشهيد " القصاص " كل القتله بيطلعوا براءة هنقتل اللي قتلوهم ونكسر الشرطة تانى زى يوم 28 .. يابنى انت وهو حق الشهيد هنجيبه لما مصر تستقر ويبقى عندنا دولة واهالى الشهداء موافقين ع خارطة المستقبل ونزلوا صوتوا فى الاستفتاء بنعم انتم احن ع الشهداء من اهاليهم! ؟. هما حرين بقا احنا نازلين علشان عايزين رئيس مدنى سيسي ده ايه عسكر مايحكمناش !
ياعم الناصرى ناصر كان رجل عسكرى ولولا السيسي ماكنا قدرنا نسقط الاخوان وبعدين شوفلنا انت رئيس مدنى بخبرة وحكمة وقوة السيسي واحنا هنكون معاه .
احنا هننزل علشان نحقق اهداف ثورة يناير عيش وحرية وعدالة اجتماعية !!
طيب هو انت هتعرف تحقق أى شىء من غير ماترجع مصر دولة ولها رئيس ومجلس نواب ؟
أناهجبلك من الآخر ياست الكل عشان تريحى نفسك انا مالى بالدولة والرئيس ومجلس النواب احنا لازم نتوحد مع الاخوان بصراحة الحالة ناشفة والاخوان بيدفعوا كتير هى يعنى البلد لما تستقر حد هيسأل عنى ولا هيأكلنى، والبت بتاعتى بتزن عليا اروح اخطبها ومش عارف هو دومة ولا احمد ماهر اتجوزوا منين على الاقل انا مش هتحالف مع دول اجنبية انا هحط ايدى ف ايد مصرى زيي البلد مش هتخرب يعنى لحد اما ألم حق الشبكة منهم .وعلى فكرة مصر محفوظة ليوم الدين يعنى اللي احنا بنعمله ده مش هيأثر ع خارطة الطريق بس احنا هنستفيد هى مصر يعنى هتكره لنا الخير .. يابنى فى شباب غلبان وفاهم غلط ممكن يموت وهتكون انت وغيرك السبب فى موته لانكم اللي ضاحكين عليهم باسم الثورة.
يا أبله اينما تكونوا يدرككم الموت لو مكتوبله يموت هيموت ده ربنا اللي عايز كده بقا احنا مالنا .. ده كان جزء من حوار دار بينى وبينه ، ومن خلال المناقشة تأكدت ان المال السياسي هو من افسد قاعدة عريضة من الشباب المصرى ، وأطالب السيد المستشار عدلى منصور رئيس الجمهورية بتطبيق قانون من اين لك هذا على الجميع وسنكتشف أن تسريبات الدكتور عبدالرحيم على هى نقطة فى بحر خيانة الوطن .. افيقوا يرحمنا ويرحمكم الله.
