يعانى أهالى شارع مندور بأرض اللواء بمحافظة الجيزة، من تراكم القمامة، التى دفعت الأهالى للتقدم بعدد من الشكاوى، والاستغاثة بالمسئولين لإنقاذهم من رائحتها، وانتشار الحشرات والأمراض بين أطفالهم.
يقول «منير» أحد سكان الشارع، ٦٥ عاما: «الريحة صعبة فى المكان هنا، غير الحشرات المنتشرة بسببها، والمنظر ده غير آدمى بالمرة».
وتقول «هناء على»، ٢٦ عاما: «أنا مريضة بالصدر وعندى حساسية شديدة، والقمامة سبب رئيسى فى انتشار الناموس والذباب فى المكان، ولما باستخدم مبيدات حشرية بتعب، وفى نفس الوقت مش قادرة أقاوم الحشرات دى، طب أعمل ايه».
أما «أبوعلى»، ٤٥ عاما، فيقول: «القمامة تحاصرنا، وبصراحة دى مش عيشة ترضى حد، ولما أنزل أجيب طلبات بيتى أمشى فى وسط أكوام الزبالة، ده يرضى مين يعنى، لازم يكون فى حلول بدل العذاب اللى إحنا عايشين فيه ده حرام».
ويستكمل: «عم عبده»، ٦٠ عاما: «أنا زى أى واحد بحب أهوى بيتى، أو أقعد فى البلكونة عشان أشم هواء نقى، مجرد ما بفتح أى منفذ للبيت أشم ريحة القمامة، ده غير الحشرات اللى بتدخل وتبهدلنا، بجد أنا بعانى معاناة كبيرة أوى من القمامة، فيا ريت الحى يكتر صناديق فى كل مكان، وحد من عمال النظافة يأخذها كل يومين، بدل ما نمشى وندوس عليها».
وناشد أهالى شارع مندور، المسئولين، بحل أزمة انتشار القمامة التى تمنعهم من العيش بشكل آدمى.
