إذا كنت من سكان المنوفية، ربما تأخذك قدماك ذات مرة إلى زيارة مدينة شبين الكوم للاستمتاع بما تحتويه من أماكن جميلة، بالتحديد فى الأماكن القريبة من فرع النيل الممتد هناك، وبمجرد مرورك أمامه من الجهة اليمنى لاستنشاق الهواء النقي، ستجذبك رائحة طعام شهية وغير تقليدية نابعة من شارع مصر، وبالسير وراء تلك الرائحة ستصلك قدماك تلقائيا إلى «سعيد»، ربما يخدعك صغر حجم مطعمه، ولكن «يوضع سره فى أضعف خلقه».
فبمجرد التدقيق فى قائمة الطعام تجد جميع الأصناف المصرية والغربية، ويتم طهيها على الطريقة «المنوفية والإيطالية»، حسب الطلب ونوع الوجبة، «الزبون على حق»، رغم كونها مقولة مصرية إلا أن هذا ما تعلمه سعيد توفيق بعد خدمة ١٨ عاما بالمطاعم الإيطالية والعالمية.
وعن مشروعه يقول سعيد: «مكانى الصغير بنبيع فيه كل حاجة أنا وشريكي، سى فود، أسماك وجمبري، مكرونة ونجرسكو، كريبات، وطبعا جودة الأكل رقم واحد عندي، مش بجيب لحوم غير من شركات مضمونة وبعمل أغلب الأكلات على الطريقة الإيطالية، الغربة علمتنى طرق مختلفة فى الطهي، واتعلمت مبصش لأسعار غيري، احنا بنحدد هامش ربح معين وبنحط الأسعار بما يتوافق معاه وليكن ١٠ أو ١٥٪، لدرجة أن الزباين ساعات بتستغرب ليه أكلكم حلو وبتبيعوا رخيص، ده لأن لما بنبيع أكتر بنخلص الكميات الموجودة وبنجيب تانى يوم أكل طازة فبنضمن طعم لذيذ».
ويختتم: «المكان هنا جميل والفيو حلو على البحر، لكن للأسف حاجات بسيطة مبوظة حلاوة المكان، منها عدم وجود حمام نضيف للزباين والموجود لا يليق بيهم بالمرة، وناس كتير بتشتكي، والسبب التانى مفيش تاندة تمنع عنهم الشمس والمطر، من يومين باظ منى أوردر كبير لأسرة كاملة بـ٢٧٠ج بسبب أن مياه المطر نزلت عليه واللحوم اتبلت للأسف رميته واعتذرت للزبون قولتله حقك عليّ طبعا مدفعتوش مقابل الأكل وقام مشي».
