تابع أحدث الأخبار
عبر تطبيق
يعانى سكان أهالى شارع مسجد الروضة بأرض اللواء من كابلات الكهرباء المكشوفة، والتى تمثل خطرا على حياتهم، خاصة مع هطول الأمطار.
وتقول «أم منال»، ٥٥ عاما، «أنا ست كبيرة وبخاف من الكابلات المكشوفة جدا، خاصة أنه ممكن أسند على الحائط وإيدى تلمسها من غير قصد، عشان كده بطالب بتغطيتها».
ويضيف «عم فاروق»، ٧٠ عاما، «إحنا ما بنطلبش المستحيل، دى حاجة بسيطة ولكن فى غاية الخطورة على أرواحنا، وخاصة لما الدنيا تمطر والكابلات تكون مكشوفة بالشكل ده».
وتتابع «هبة علي»، ٣٥ عاما: «بخاف كل يوم لما عيالى يروحوا المدرسة ويتأخروا عليا، بحس إنهم اتعرضوا لخطر من الكابلات دي، ده غير إنى منعاهم ينزلوا يلعبوا مع صحابهم عشان ما يغلطوش ويلمسوها يعنى حرماهم من ممارسة طفولتهم». ويستكمل «جلال علي»، ٥٠ عاما، «كل يوم بنزل أصلى الفجر ورجلى تعبانى فبضطر أسند على الحائط وأنا ماشي، فممكن فى أى وقت إيدى تلمس أى كبل منهم من غير ما أحس، لكن ربنا إللى ساترها من عنده».
وقال «أبوحمزة»، ٤٤ عاما: «المشكلة أن الموضوع سهل جدا، لكن ما فيش أى اهتمام من المسئولين، إنهم ينقذونا منه خصوصا أن أرواحنا بقت على كف عفريت، فليه كل ده وهو مش هيكلف الكثير ولا هياخد وقت من الحي».
واختتم الجميع بالتشديد على ضرورة النظر فى أمرهم من قبل المسئولين، الذين لا يعيشون مأساتهم التى يعانون منها يوميا، سواء أكانوا طلابا، أو أهالي، أو أطفالا، من الكابلات المكشوفة التى تجعلهم دائما وأبدا يعيشون فى حالة ذعر، وبوجه الخصوص فى فصل الشتاء.