على بعد خطوات من نزلة حي الهرم على الدائري في فيصل، تجد كابلات الكهرباء المكشوفة داخل «كابينة» شارع عمرو بن العاص، والتي لا تحمل غطاءً ليداري على تعرى أسلاكه.
ويعاني السكان والمارة من خطر الكهرباء التي قد تصعق أحدهم أثناء مروره بجانبها، كما تهدد تلك الأسلاك العارية حياة الأطفال، خاصة مع قدوم فصل الشتاء وهطول الأمطار بشكل مستمر.. وتقول سارة سمير، أحد سكان المنطقة: «إحنا مهددين بالموت في أي لحظة، وأولادي مش بعرف أنزلهم يجيبوا حاجة أو يلعبوا عشان بخاف يتكهربوا».
ويضيف الحج مصطفى: «كل يوم الكبل بتحصل فيه فرقعة وبيطلع منه نار وتطفي، ومنضمنش إيه تاني ممكن يحصل، وبنبقى مرعوبين لما بنعدي من قدامه والخوف مالينا الكبير قبل الصغير».
ويقول أحمد مرسي: «أنا كذا مرة كنت هتكهرب بسبب الكبل ده، وبشوف ناس كتير بتبقى معدية والكبل يفرقع من جنبهم، والأطفال كذلك، إحنا عايزين حل في الكابلات دي، عايزين المسئولين يبصوا لينا ولأطفالنا المعرضين للموت والصعق بسبب الإهمال».
