يعانى أهالى شارع «سلامة الراضى» بأرض اللواء، من الانقطاع الدائم للمياه، الأمر الذى يجعلهم لا يستطيعون مباشرة حياتهم الطبيعية، رصدت «صوت الناس» صرخة أهالى الشارع.
تقول نور محمد: «مشكلتنا المياه بتقطع طول اليوم، منذ أكثر من ثلاثة شهور، ومش عارفين نعمل إيه؟ بتفضل بالـ١٠ ساعات مقطوعة، وبتيجى بس فى أوقات متأخرة، نكون نمنا ونصحى نلاقيها مقطوعة، وممعناش فلوس نشترى مياه معدنية».
وأضاف عاطف النجار: «معايا ٤ عيال والمياه قاطعة طول اليوم ومش عارفين ناكل ولا نشرب ولا ندخل الحمام، وعاملين حفر فى الشوارع ولا فى فايدة، إحنا قربنا نعفن من قلة المياه، وأنا موظف عادى مش هقدر أشترى مياه من المحلات».
وتابع «شوكت»: «أنا راجل أرزقى على الله شغلى يوم بيوم أجيب منين فلوس للمياه؟ إحنا مش قادرين نشترى أكل علشان نشترى مياه نشرب ونستحمى بيها، إحنا محتاجين حد من المسئولين ييجى يسكن مكاننا لمدة يوم ويشوف المعاناة، أنا بناشد المسئولين إنهم يحلوا لنا المشكلة التى أصبحت كابوسًا لنا، ونعانى منه كل لحظة».
