راجع بَأشَبِه ع الحياة مش عارف
الوقت هو والا النهار زايف؟
السكة عوجة.....
وآخرها فيه منحدر
بلد الملايكة....
صبحت بلاد للغجر
والاندهاش من عينى خارج
سيناريو مش مفهوم
إزاى شعور حالم
يبقى شعور مهزوم؟
كان ليا صاحب وصاحبة
وفكرة مجنونة
تحت المطر ماشيين
والبرد عاشق
والبحر فيه جرأة
عيون ف روحها يبان
الوقت واسع
والأمانى حنونة
صوابعها عارفة تعزف الأحلام
تعمل موسيقى....
وابدأ أغنيلكم....
كان فيه نبى يشبهنى يا حبيبتى
ما عِرِفْشِى إن الضياع كان جى
صلبوا الغياب على جذع أحلامه
وأما رجع ما لقاش
أيام....
أكيد البعد غيرها
راجع بَأشَبِه ع الحياة مش عارف
الوقت هو والا النهار زايف؟
وإسكندرية محدوفة تحت الهدد
أشلاء مدينة تشبه لأحلامى
يرضيكى يعنى...
أرجع وما أعرفكيش
فين البيوت...
وحزنها الطيب؟
جدران وراها للحياة معنى
فين الشوارع وهية بتحب المطر؟
دلوقتى ليه بتخاف...
لو مر ضى القمر؟
