يوظف أنامله الذهبية لترجمة واقع محسوس من خلال قلمه الرصاص، مسجلًا بصماته فى عالم الموهوبين بجمال رسوماته الفنية، يمثل نموذجا لكثير من الشباب الذى لم يبحث أحد عن المواهب بداخلهم، فحكاية ابن سوهاج واكتشاف موهبته الفضل فيه يرجع لـ«الصدفة».
يقول حسام السنوسى ٢٦ سنة من محافظة سوهاج، خريج كلية علوم: كنت فى سنة تالتة وما كنتش أعرف أرسم لأنى ما رسمتش قبل كدة وكان فيه مسابقة فى الكلية راح واحد صاحبى كان ساكن معايا وكان بيرسم، قالى تعالى أرسم أى رسمة وخلاص، وقلت أجرب، رسمت أول رسمة كانت لـ«بن تن» كرتون وطلعت حلوة، وأخذت فيها مركز حلو على مستوى الكلية، ورسمت حسام غالى وصلاح ومستر بين والقرموطى والكبير.
ويتابع: «أنا بحاول أتعلم وبعد لما أخلص شغلى، بالليل برسم من ٣ إلى ٤ ساعات، وبشوف فيديوهات على اليوتيوب عشان أظبط الملامح والعيون، ومع الاستمرار فى الرسم بتحسن تدريجيا، وحلمى أطور من نفسى وأكون فنان عالمى».
