استعرض الدكتور طارق شوقي، وزير التربية والتعليم، اليوم السبت، خلال اجتماع لجنة المشروعات الصغيرة بمجلس النواب، تطوير منظومة التعليم وقضية مجانية التعليم.
وتنشر البوابة نيوز نص كلمة الوزير طارق شوقي أمام مجلس النواب:
"مجانية التعليم تحدد قدرتنا على الحركة، اللي كتب الكلام دا عام ١٩٥٢ مكنش يعرف إن مصر هيبقي فيها هذا العدد من السكان، إزاي عندنا إصرار نعلم الخايب والشاطر زي بعض، أنا بسأل اللي بيتكلموا عن العدالة الاجتماعية في هذه النقطة، يعني إيه عدالة اجتماعية، هل أضيع الكل لما أدي للشاطر زي الخايب، لأ أنا مش مع هذا النوع من العدالة ولا مؤمن بيها، فكرة العدالة المبسطة دي فيها ظلم فاحش، ظلم اجتماعي متساوي، فَلَو انتوا عاوزين تصلحوا بجد، لازم تناقشوا هذه الأفكار".
وأضاف بقوله: "مجانية التعليم مينفعش تتساب بدون نقاش، لازم تناقشوه، لو فضلنا عايشين بدا نبقى بنضحك على نفسنا، هنفضل عايشين كده لامتى، ثم مفيش مجانية، اللي بيدفع الفاتورة الدولة والأهالي، الفاتورة اللي بندفعها مع بعض ٢٠٠ مليار جنيه، ومش بتروح في المكان الصح، والناس ممكن تدفع لأى حد إلا الحكومة، ثم سؤال للي بيقول لنفسه ملك الكيمياء، مين اللي خلاك ملك الكيمياء معاك شهادة بتقول كده ؟".
وتابع شوقي: "حفلة عمرو دياب وصلت لـ ٢٠ ألف جنيه للتذكرة، واحنا مش لاقيين فلوس نطور بيها التعليم، ولما نتكلم عن مجانية التعليم وضرورة إعادة النظر في المصطلح، الناس ممكن تحدفنا بالطوب، الرئيس نفسه كان بيقول هنحل مشكلة الكثافة إزاى، ثم لو جيت قلت نلغي التنسيق الناس تعمل ثورة على طول، لأن نظام التنسيق هو اللي بيطلع الناس اللي قاعدة على القهوة، لإنه بيطلع تجارة إنجليزي وحقوق إنجليزي بمئات الآلاف، في حين إن سوق العمل مش محتاجهم، لو احنا حددنا احتياجاتنا بغض النظر عن التنسيق بيضخ كام كانت اتظبطت".
