ننشر نص كلمة الرئيس في جلسة "ما بعد الحروب والنزاعات.. آليات بناء المجتمعات والدول"

قال الرئيس عبد الفتاح السيسي، أثناء مشاركته في جلسة "ما بعد الحروب والنزاعات.. آليات بناء المجتمعات والدول"، وذلك ضمن فعاليات منتدى شباب العالم المنعقد في مدينة شرم الشيخ: "أحيي جميع السادة المتحدثين وأشكرهم على تواجدهم معنا وأشكرهم على إثرائهم للحوار ومساهماتهم في جلسة تناقش موضوعا من أهم الموضوعات في منطقتنا التي تعج بالصراعات.

وتابع الرئيس السيسي حديثه: "لو كان لي مساهمة فأنا بأكد للى بيسمعنا.. أنا لا أتناول المسألة من منظور سياسي وبنتقى الألفاظ والأفكار وببعد عن النقاط التي تسبب إشكاليات، سأتكلم معكم بتجربة مصرية شاهد عليها وعلى الأحداث التي تمر في المنطقة.. خذوا كلامي وفكروا فيه.. كلامي يؤخذ ويرد.. اللي تجدوه مناسب اهتموا به واللي مش مناسب ميجراش حاجة، وأول نقطة في المساهمة بتعتى هتبقا من جزئين.. جزء ما قبل الأزمة وجزء ما بعد الأزمة.. جزء ما قبل الأزمة هو تقدير المواطنين والرأي العام في بلادهم لحجم التراجع وحجم التخلف وحجم المطالب التى يريدون تحقيقها.. اتصور أننا اللي شفناه في الدول التي مرت بالأزمات دي.. التكلفة الإنسانية والتكلفة المالية والتكلفة الأخلاقية اللي دفعتها الدول دى.. أكبر كتير من لو كان الأمر استمر بدون تغيير.. أقولها تانى.. التكاليف إللى دفعتها الدول اللى دخلت في الأزمات دي أنا بقول من كل الوجوه وأرجوا أنكم تنظروا للصورة بشكل كلى وليس بشكل جزئى بسيط، و أنا مش هتكلم على التكلفة المالية لكن أنا عاوز أقول ليكم يا ترى الطفل أو الطفلة اللي قعدت 9 سنين في معسكر لاجئين شخصيتها هتطلع عاملة إيه.. يا ترى هتطلع شخصيتها سوية وإذا كنا بنتكلم عن مئات الألوف والملايين فنحن بالإصلاح اللى تصورنا أننا نعمله فى بلادنا من خلال التحرك غير المدروس.. أنا هقول غير مدروس مش هقول أبداً أنه مؤامرة، لا هو غير مدروس.. تصورنا أننا ممكن نغير واقعنا من خلال هذا التحرك واحنا بنعمل هذا التحرك ده إحنا بنفتح أبواب الجحيم على بلادنا.. أنا بقول على بلادنا لأننا كنا بلد من البلاد المرشحة أنها تبقى كده".

واستطرد الرئيس: "أنا كنت بقول من سنتين تلاتة خلوا بالكم من الانتحار القومي.. الانتحار القومي.. وأنا بقول الكلام ده فيه شباب من أوروبا يبقى معندشهم التصور ده والمشاكل الموجودة عندنا فى المنطقة العربية والمنطقة الأفريقية أو الدول الأفريقية.. ويبقا هما بالتالى شيفين الكلام ده.. عاوزين يقولوا لي أن ده معناه أننا لا نغير.. ده معناه أننا نسكت.. أنا مقلتش كدا.. بس بقول ليكم على الباب اللي هتفتحوه لأن قوة حشد الشباب أو حشد الرأي العام لتغير الأمر بقوة قد يخرج وفى الغالب يخرج عن السيطرة.. ولما يخرج عن السيطرة ينشأ فراغ هائل.. هذا الفراغ الهائل يؤدى إلى تدافع القوى المحلية والأجنبية أو الخارجية من أجل التدخل فى شئون الدولة.. وتتداعى مؤسسات الدولة مؤسسة وراء مؤسسة.. تبدأ في الغالب بالمؤسسات الأمنية والقوات المسلحة ثم بقيت المؤسسات تأتى بالتبعية، وأنا هقول لكم كلكم إذا كان أقل تقدير اتقال فيه أن سوريا تحتاج إلى 300 مليار دولار.. 300 مليار دولار وأقصى تقدير تريليون دولار.. أنا عاوز حد يقول أنهى حكومة فى سوريا مهما بقا جاءت من الأغلبية أو الأقلية هتقدر تعمل أيه مع التحدى ده.. أنتم فاكرين إن حد فى العالم هيمد أيده.. أنا بقولها على الملاء أنه يطبق 300 مليار دولار ويديها لدولة ولا أيه.. دول بيتخانقوا على 10 مليار.. هو الصراع الموجود فى العالم موجود على أيه.. على النفوذ والأموال والمصالح ..حد يديك 300 مليار تصلح بلدك.. مش أنت اللى كسرتها.. مش أنت اللى خربتها.. اصلحالك أنا ليه.. لا أنا أصلح بلدى.. وأبنى بلدى وأبنى لشبابى فى الدول المتقدمة.. لكن ليكم أنتم.. أنتم اللى بتعملوا فى بلادكم كدا وأنتم اللى بتخربوا بلادكم.. أنا بقول ليكم الكلام والله لن تسمعوه من أحد أبداً فى موقعى اللى أنا فيه ده وأنا أن شاء الله بحاول أنى أكون صادق والمبعوث الدكتور دى ميستورا يعرفنى كويس التقينا سوياً وتحدثنا حديث خاص ويعلم أن الكلام اللى بقوله ده هى قناعات ناتجة عن خبرات لممارسات عشناها.. مش كلام إحنا بنقوله.. إحنا عشنا كل يوم.. كل يوم بنعيش فى مرار ومعاناة لأجل المحافظة على بلدنا و100 مليون مصرى.. الدكتور غسان بيقول أنه فى ليبيا عندهم فيه دول ريعية فتقدر يخشلها دولارات من مصادر البترول.. إحنا فى مصر معندناش بترول.. معندناش ده.. كانت هتتخرب وتضيع وترجعش تانى وتبقا ملايين من المصريين بتهاجر على أوروبا أو دول الجوار أو تضيع فى الصحراء والبحار".

ووجه الرئيس رسالة إلى الرئيس قال فيها: "اشتغلوا واصبروا وتحملوا وقاسوا وعانوا.. زي ما أنتم عاوزين، بس متعانوش في الخراب، قاسوا زي ما أنتم عاوزين بالواقع اللى مش عاجبكم.. لكن متعانوش أنكم تدمروا بلادكم لأنها لن تعود.. البلاد اللي راحت.. اللى أنا عاوز أقوله.. أنا قلت إني هتكلم على فترة ما قبل.. فترة ما بعد تكلم وتحدث بلا حرج.. شوف عاوز تتكلم عن هدم مؤسسات الدولة تكلم.. مؤسسة مؤسسة ..عاوز تتكلم عن قيم ومعايير الدولة الضائعة.. تكلم.. عاوز تتكلم عن القيم الأخلاقية والإنسانية التي ستهدر نتيجة الحالة اللى بنتكلم عليها اتكلم.. قولى لى مين يرجع لى ده.. قول لي مين يرجع إلى القيم الأخلاقية والإنسانية اللى كانت موجودة فى مجتمع بعد ما يدخل فى معسكرات اللاجئين لمدة 10 سنين.. الطفل ده شاف إيه.. الطفلة دى شافت أيه أو اتعاملوا إزاى.. أنا عاوز أقول للناس اللى بتسمعنى كلها.. أنتم لا تقاوموا الإرهاب فقط.. أنتم تجهزوا كيانات جديدة للإرهاب ..هذا الأمر تغذية للإرهاب لأن هذه العناصرة وهذه البشر اللى بتكلم عليهم.. برامج إعادة أعمارهم زى ما تقال من الدكتور دى ميستورا من إعادة إعمار نفسى والإنسانى ده برنامج ضخم جداً نعمله لكام مليون.. هما هيعمروا أنفسهم الأول".