وصل الغاز الطبيعى إلى جميع الشوارع المجاورة عدا شارعهم، فما زال سكانه يعتمدون على شراء الأنابيب، التى يعانون معها أشد المعاناة، هم أهالى حارة الحاسوبى بشارع داير الناحية بمنطقة الدقى المحرومون من حقهم مثل باقى الشوارع المجاورة من تركيب الغاز الطبيعي، وقدموا استغاثات عدة من قبل، ولكن لا أحد يهتم بهم، لذا يناشد أهالى حارة الحاسوبى بعد تكرار شكواهم شركة الغاز الطبيعى لرفع هذا الظلم الذى لحق بهم ومد خطوط الغاز إليهم. يقول محمد حسوبي: ٥٥ عاما «مشكلتنا هنا أن الغاز الطبيعى دخل لكل الناس حوالينا ومدخلش حارتنا، ولحد الآن بنشترى الأنابيب ونعانى عشان نطلعها الشقق، وقدمنا أكثر من شكوى بس مفيش حد مهتم بيها، ومن فترة لما كانوا بيركبوا فى المنطقة، اتكلمت مع المهندس علشان يدخل للحارة بتاعتنا غاز طلب منى فلوس، أنا رفضت ومن وقتها الغاز دخل لكل الناس إلا حارتنا إحنا، من حقنا زى الناس يدخلنا خطوط غاز، ودلوقتى داخلين على الشتاء، والكل يعرف معاناة أنابيب الغاز واستغلال التجار، وإحنا هنا ٥٠ أسرة كلنا غلابة وعلى قد عيشتنا مش بنقدر على تكاليف فى الشهر ٢ أنبوبة غاز». وأضافت الحاجة ثرية ٦٠ عاما: «احنا محتاجين غاز عندنا الأنبوبة لما بتخلص بعانى عشان أجيبها وبدفع سعرها الضعف، كل جيراننا وصلهم غاز إلا إحنا مفيش حاجة جتلنا».
واختتم الأهالى شكواهم ليوجهوا استغاثاتهم إلى المسئولين لإنصافهم وأن يرحموهم من المعاناة الذى يواجهونها خاصة مع قدوم الشتاء واستغلال التجار لأسعار الأنبوبة.
