تناشد «أمل حارس» (٥٠ عاما) تقيم بحارة أبوالنجا بمنطقة ميت عقبة أهل الخير والثواب مساعدتها فى دفع إيجار مسكنها، والإنفاق على طفلة ابنتها الصغيرة وتجهيز ابنتها الأخرى للزواج، تقول أمل: «مشكلتى إنى مطلقة، وبنتى برضو حظها طلع وحش زى أمها، وللأسف مطلقة هى كمان، ومعاها طفلة وعايشة معايا وعندى بنت لسه متجوزتش، ومفيش عندنا أى دخل، وعيشتنا على قد الحال، وبنجيب لقمتنا بالعافية، والمصاريف كل يوم بتزيد عليا ومالناش حد يسأل علينا، أنا العائل ليهم، والمصاريف زادت عليا، مش عارفه أدفع الإيجار٣٠٠ جنيه، وبعانى كل شهر».
وتتابع: «إحنا غلابة ومعندناش أى دخل، قدمت على المعاش من سنة، وكل ما أروح يقولولى مفيش، ومعرفش إيه سبب رفض المعاش رغم إن أوراقى كاملة ومستوفية، إحنا كل يوم عيشتنا بتسوء أكتر من الأول، وبنتى معاها طفلة، والدها رفض يبعتلها مصاريفها، واحنا حتى مش معانا فلوس نقدر نرفع بيها قضية وبنجيب احتياجاتنا بصعوبة، وكل يوم الحاجة بتغلى والهم بيزيد علينا، ومعايا بنت على وش جواز، ومش قادرة أجهزها، هنجيب منين». واختتمت: «نفسى أعيش أنا وبناتى مرتاحين لأننا معدناش راجل ومش حمل بهدلة، بتمنى نوفر لقمتنا ومصاريف الإيجار حتى لو مساعدة شهرية بسيطة تساندنى على احتياجاتنا وإطعام الطفلة وعلاج بنتي».
للتواصل مع الحالة٠١٢٨٢٠٩٦٩٧٠.
