أبويا اللي علم وربّي وحارب

أبويا اللي علم وربّي وحارب وقاتل وقال أنا ابن مصر.
أبويا اللي شال سلاحه وقال هموت جمب أرضي أنا فدى مصر.
أبويا اللي حارب والسن غالب والشعر أسمر بلون التراب.
أبويا اللي علّى صوته وقال الله اكبر والنصر ليكي يا أمي يا مصر.
أبويا اللي صايم وقايم يضحي ويرفع راياتك في كل اتجاه.
أبويا اللي قال الأرض حق والحق حق واحنا الأحق.
أبويا اللي راح في عز الظهيرة وشايل سلاحه وما همه حد.
أبويا اللي علم وربّى وكافح وقال يا بلدي أنا وابني لمصر.
أبويا اللي كان ما يعلم مكان ولكنه للحرب كان مش جبان.
أبويا اللي حرر ودافع وطهر رملة بلادي من الصهيون.
أبويا اللي قالي دي مصر معاها الكرامة وعزة النصر.
أبويا اللي قال النصر عال أرض مصر مش أدغال.
أبويا اللي راح يغني ويرقص ويهتف باسمك يا أغلى مصر.
أبويا اللي همه دا زي همي ودا كلو عشانك يا بلدي.
أبويا اللي شال زميله الشهيد وأخوه العميد وعمه العقيد.
أبويا اللي فتح رصاصه وعلّى راسه دا ابنك يا مصر.
أبويا اللي هزم العدو الخسيس وضربه في قلبه.
أبويا اللي شاف هزيمة عدوه وحسرة جنوده.
أبويا اللي نام وسط الجبال تحت الرمال ولا همه خوف.
أبويا اللي كتب شهادة وفاته قبل ميلاده عشانك يا بلدي.
أبويا اللي مني وهو اللي قاللي انت ابن مصر.
أبويا اللي قلبه مفتوح لابنه ودايما يقوله خد بالك دي مصر.
أبويا اللي شاف دبابة عدوه ولا همه منها وقال يا رب.