يعاني أهالي شارع محمود بدر الدين بميت عقبة، من عدم رصف الطريق العام، حيث لا يستطيع كبار السن السير في الشارع لأن الحفر والتشققات تعوق حركتهم أثناء السير، والتي تسببت في مشاكل وخيمة لديهم.
ويقول الحاج عبده، أحد سكان المنطقة، والبالغ من العمر ٧٠ عامًا: «الطريق مليان بالحفر وده ما يرضيش حد، خصوصًا أنه شارع عام يعني الحركة عليه كتير، فياريت يكون في اهتمام أكبر بيه، وأنا راجل كبير وكل يوم بروح أصلي الفجر في الضلمة، وغصب عني رجلي بتقع في الحفر دي أكتر من مرة وربنا بينجيني».
وتتابع أم ميادة البالغة من العمر ٥٠ عامًا، «المنظر العام للشارع مش كويس خالص وميرضيش ربنا، والأمر بيزداد سوءًا لما الشتا بيدخل ومية الأمطار كلها بتتكوم هنا، فيا ريت يترصف، خصوصًا أن كل السكان بيعانوا من المشكلة دي».
ويتابع إيهاب على، البالغ من العمر ٣٠ عامًا، «مكان معروف زي ده إزاي يتساب كده من غير رصف أمال خلينا إيه للحواري والشوارع الجانبية، وبعدين إحنا ما بنطلبش المستحيل كل إللي بنطلبه إن حد من المسئولين ييجي يشوف الشارع عامل إزاي».
وأضاف شهاب أحمد، البالغ من العمر ٢٥ عاما، «بلدنا فيها كل حاجة وعكسها، يعني المكان المفروض أنه واجهة لكن للأسف مش باين فيه أي اهتمام، ليه مش عارف بصراحة، وفي النهاية كل اللي بتمناه أن الشارع يكون نضيف، وإحنا بنحاول ننضف على قد ما نقدر لكن الحي كمان يعمل اللي عليه ويرصف الشارع».
وناشد أهالي المنطقة، المسئولين بضرورة رصف الشارع، وذلك لمعاناتهم من قلة رصف الطريق العام لسنوات طويلة.
