يستغيث أهالى شارع أحمد جلال، بميت عقبة، برئيس شركة المياه والصرف الصحى، بالنظر فى مشكلتهم، لأنهم يعانون من ارتفاع فواتير مياه الشرب؛ إلى الحد الذى وصلت فيه قيمة الفاتورة لـ٦٠٠ جنيه، رغم الانقطاع الدائم للمياه. الحاجة «فاطمة» من قاطنى الشارع تقول: «نعانى من انقطاع المياه الدائم، وأرسلنا أكثر من استغاثة للحى، ومع ذلك فواتير المياه تأتى إلينا مرتفعة، يعنى موت وخراب ديار، بنفضل منتظرين طول الليل علشان المياه بتيجى الفجر، نملى الجراكن واحتياجاتنا اليومية».
وتتابع: «أنا عايزة بس أعرف إزاى يكون عندى حنفية واحدة وتيجى لى الفاتورة بـ٦٠٠ جنيه فى الشهر».
ويضيف عم «أحمد على» الرجل الخمسينى، أن الأزمة ليست عند فرد أو ١٠ فى الشارع، ولكنها فى كل منزل وحجرة لديها عداد مياه داخل شارع أحمد جلال، مفيش مياه والفواتير نار وخراب بيوت، والناس هنا عايشة بالعافية، معظمهم على باب الله. وناشد الأهالى، الحى بإيفاد مسئولين من شركة المياه لقراءة العدادات ومراجعة الفواتير، والاطلاع على الوضع من الواقع، وحل مشكلة انقطاع المياه الدائم.
