يعانى أهالى شارع عفيفى بمنطقة ميت عقبة طفح مياه الصرف الصحى الذى أغرق شوارعهم وبيوتهم وقد طفح كيلهم من الشكوى إلى المسئولين ويناشدونهم سرعة إيجاد حل للأزمة وإنقاذ أطفالهم من الأوبئة والأمراض التى تلحق بهم جراء مياه الصرف.
يقول عم أحمد، ٥٠ عامًا ويقيم بنفس الشارع: «مشكلتنا الصرف دمر بيوتنا ولما ماسورة تنسد البيوت بتبقى بحر من جوا، ومش عارفين نعيش وكلمنا الحى أكثر من مرة ومفيش أى شخص استجاب لينا وبنفضل نشيل مية من البيوت باليومين والتلاتة، وتعبنا من دا، واحنا محتاجين أى مسئول ينزل المنطقة يشوف شارعنا ويشوف عيشتنا، إحنا عايشين فى بحر مجارى وعيالنا هيجيلهم المرض ومش عارفين ناكل ولا نشرب ولا نقعد فى بيوتنا بسبب المجاري».
وأضافت أم حسين ٣٦ عاما وتقيم بالشارع: «أنا عايشة أنا وعيالى فى أوضة والمجارى لما بتطفح كل حاجة عندنا بتغرق، ونفسى حد يحل لنا المشكلة دى والمشكلة الكبيرة فى كابلات الكهرباء قدام الباب ومية المجارى بتغرقها وخايفة فى يوم تكهربنى أنا وعيالى ونفسى ينقلوها قبل أن تتسبب فى موت أى حد».
ويناشد أهالى شارع عفيفى بمنطقة ميت عقبة المسئولين حل هذه المشكلة وتغيير مواسير الصرف الصحى ونقل صندوق الكهرباء خوفا على حياتهم ويرجون الاستجابة لحل مشكلتهم.
