«كل يوم بعمل مقلب جديد في بيتنا ومع صحابي».. هكذا بدأ دانيال مجدي أصغر طفل مهرج مصري صاحب الـ«٤» أعوام في سرد قصصه المهرجة.
يقول دانيال: «أنا بحب الهزار جدًا وقبل ما بنام كل يوم بفكر أعمل مقلب جديد في بيتنا.. هما أوقات كتير بيضيقوا مني بس أنا طبعي كده ومش عارف أغيره وآخر مقلب عملته مع ماما النهاردة كانت بتطبخلنا في المطبخ روحت رايح من وراها وواخد كبشة الشوربة ومقصوصة الأرز ومخبيهم وجت تبص وراها وتدور وهى مضايقة وأنا كنت واقف بعيد فى الصالة وهموت من الضحك بس بعد ما ماما عرفت إني عملت كده اتضايقت جدًا لكن قعدت تضحك بعد كده عادي».
وعن أصدقائه يتابع: «أنا لما بنزل ألعب معاهم بحب أستخبى وأروح منادي مرة واحدة في ودنهم بلاقيهم يتخضوا أوي.. أنا بموت من الضحك وقتها ويطلعوا يجروا ورايا عاوزين يضربوني عشان بعمل كل مرة كده».
وعن أمنيته يستكمل بأنه يتمنى أن يكون ممثل كوميدي كأحمد حلمي ومحمد سعد لأنه يحب أفلامهم كثيرا ويقلدهم في أفلامهم مع أصدقائه وأهله، ويختتم: «أنا بحب أكون مبسوط دايما، عشان كده بعمل مقالب مع الناس، وبزعل أوى لما بلاقيهم يزعلوا مني، مش عارف ليه، وبحب اللي يساعدني على المقالب جدًا».
