يعانى أهالى مساكن «الحضرة البحرية» بمحافظة الإسكندرية، من تراكم القمامة حول المبانى السكنية، وانتشار الروائح الكريهة والزواحف والثعابين، والحشرات الضارة، منذ عدة سنوات نتيجة إهمال مسئولى النظافة بالمنطقة، مما يهدد صحة أطفالهم. وقال محمد بسيوني، موظف، أحد سكان المساكن: «المنطقة مفيش أى اهتمام نهائى بها، من قبل المسئولين، إحنا عايشين وتحتنا خرابة، وبلكونات العمارة بتطل على المنظر ده، وكثير من الأوقات بيكون فيه تعابين وفئران وجميع أنواع الزواحف، وده بيخلى حياة أطفالنا فى خطر». وشاركته الرأى منى عبدالعظيم، سيدة منزل، إحدى سكان المنطقة أيضا بقولها: «المكان ده متنضفش ولا بيدخله أى عامل نظافة، من ١٠ سنين، ده غير أن البيوت متآكلة من تحت، بسبب المجاري، اللى مغرقة الأساسات من تحت، بجانب تراكم الزبالة، وبلغنا كذا مرة وبعدها جت لجنة من الحي، لكن لا حياة لمن تنادي، يا ريت تشوفوا لنا حل بسرعة علشان إحنا تعبنا»- حسب تعبيرها.
