غياب الشمس
لما بتغيب الشمس
بتسح الدمعات
أخدود تحت الجفن
فوق العين سحابات
ترعات الهم جوه القلب
وآلام بتجرح فى ضميري
وضميرك
وضميرهم نايم
الصاحى فيهم ما يتعداش حقد
ما بيخرجش للرايد دبحى ودبحك
خارج لينا
هيورينا
إن برودة طوبة وأمشير
مكتوبة علينا طول العمر
■ ■ ■
لما بتغيب الشمس
بأحس
إن دماغى باردة
والكلمة فيها باردة
ما بتخرجش
ولسانى مدبوح
وإيديا دايما فى جيوبي
ما بتخرجش
(العزى) لابس بوت
ماشى يتحنجل
يتطوح
شارب برد حتى نخاعه
ودماغه خربان
■ ■ ■
من حقى وحقك
إن شعاع الشمس يجيلنا دافى
من غير ضله
الضله.. ضلام وبرودة وعذاب
شمس الصيف محبوبة
محبوسة جوّايا الآه
مش قادرة تطلع برايا
طالعة جوّايا
ومألماني
سكاكينها حامية، جارحة
ومقطعة شرايين قلبي
محبوسة جوايا الآه
حالفة ماهى طالعة
إلا إن حست شمس
شمت شمس
سمعت شمس
لمست شمس
شافت شمس الدنيا حواليها
قصيدة لـ«حسن عبدالشافى»