«جزء من خبرات حياتنا مش بنتعلمه إلا من خلال التجربة، إن أيدينا تكون فى الموضوع ونحس بضغط المشكلة وتصاعدها لغاية ما نوصل للحل، الخبرة الشخصية والمرور بالأزمة أو المشكلة صعب إننا نستعيض عنها بحاجات تانية، زى القراءة أو إننا نتفرج عليها فى فيلم أو مسلسل، مهما اتوصف لنا، صعب نفهم ونحس، مهما اتقال لنا عن سخونة الشوربة مش هنقدر نحسها إلا من خلال لمسها، ممكن بعدها ننفخ فيها أو نبردها، ده اختيارنا، وممكن التجربة تقودنا إننا ننفخ فى الزبادى برضه، بس مش كل الناس، هيفضل البعض منا يتلسع وميحرمش، هو طبعه كده غاوى لسع.. ممكن تقول عليه إنه هو شخصية لاسعة أو البعض ممكن يسميه مغامر أو بايع القضية».
المعايشة الحية للخبرة والمرور بكل مراحلها هى اللى بتصقل الشخصية، وبتكون رصيد من الخبرات المتعلمة اللى بتسمح للشخص يكون عنده سعة حيلة وقدرة على حل المشكلات.
"ده له معنى مهم، لسعة الشوربة مفيدة، والأكثر من كده مهم إن الشخص يتلسعها مرة واثنين ده ليه؟ لأنها مش هتموته دى حاجة، الحاجة التانية هايتعلم منها.. طبعًا مش كل الخبرات محتاجين نمر بها ونختبرها بأنفسنا، فى خبرات ملهاش تانى، ولا بعدها حياة من أصله بمعنى ما أدخلش فى الغريق وأنا مبعرفش أعوم وأقول خبرة.. لا دى تبقى خيبة بعيد عنك.. ولا أجرب حاجة تودينى فى حتة ومعرفش أرجع منها.. دى بقى تبقى كارثة.. الكلام المفيد بيقول.. لو تحب تجرب استشير مجرب.. والمجرب اللى أقصده يكون شخص أمين وعاقل وقادر على أن يرشدك للصح.. مش يغرقك ويقف يتفرج.. زى ما كتبت قبل كده إحنا كلنا واقفين على سلم التعافى.. فى ناس درجة أعلى.. وناس درجة أقل.. كلنا ماسكين فى إيدين بعض.. نسند وندعم ونشجع ونهون.. اللى تحت يسأل اللى فوق عملتها إزاى؟
واللى فوق يقول للتحت أنت تقدر، عملتها قبلك بالصبر والتدريب.. كونوا أصحاء بنقل الخبرة وتقديم الرسالة.
