بوجه عابس، وقف الشاب عمر شعبان أحمد، ٢٣ سنة، مستندًا على آلته التى صنعها لسن السكاكين، راح ينظر إلى الشبابيك ويسترق السمع على أمل أن يناديه أحد، لكن أمله طار مع الهواء، الذى ملأ عينيه بحبات الرمال، فجلس ينعى حظه العاثر.
يقول «عمر»: «أعمل فى سن السكاكين يوميا من السابعة صباحا إلى آخر الليل، وطول اليوم لف ودوران على رجلى فى الشوارع عشان أعمل فلوس أصرف بيها على بيتى، وفى النهاية ممكن أروح بـ١٠ جنيهات، لا أستطيع أن أصرف منها على أسرتى»، مضيفًا: «الحقيقة بنعيش على المساعدات من أهل الخير، ممكن حد يدينى كيس سكر أو عبوة زيت وممكن حد تانى يدينى فلوس وممكن لأ».
وتابع: «أعيش أنا وزوجتى اللى لسه والدة بالديون، والمفروض إنى مديون بخمسة آلاف جنيه، أنا معنديش مصدر رزق أعيش منه ولا آكل أولادى أنا تعبان، واللى فى قلبهم رحمة قلة هذه الأيام كل الناس بتفطر فى بيوتها أول يوم رمضان إلا احنا على الرصيف فى الشارع».
وختم حديثه بعبارة: «نفسى أسدد ديونى، وأعالج ابنى اللى محتاج علاج شهريا بـ ٢٧٠ جنيها، معايا منهم ٣٠ جنيها، وكل أملى من ربنا الستر ومصدر رزق أعيش منه أنا ومراتى وابنى».
