تلقى بريد «صوت الناس» صرخة أسرة تناشد السيد رئيس الجمهورية، بإدراج أسماء حراس العقارات، ضمن المواطنين الذين يستحقون الحصول على وحدات سكنية، تقول سماح حسين، صاحبة الـ٣٥ عامًا: «جايين من الفيوم أنا وجوزى وعيالى، ولا حيلتنا حاجة غير فضل ربنا الكريم، هربنا من الفقر فى الفيوم، لقيناه مستنينا تحت السلم فى القاهرة، أنا وجوزى عايشين فى أوضة غير آدمية تحت السلم فى إمبابة، ودخلنا بيعتمد على حراسة العقار، وإحنا مش محدودى الدخل إحنا منعدمين الدخل، لا سكن ولا شغل ولا حياة، اسمنا عايشين والحقيقة إننا موجودون فى قبر تحت السلم».
مضيفة: «نفسى مسئول يجى يشوفنا ويشوف العيال وهى على الأرض، المكان اللى بنام فيه بندخل فيه الحمام وبناكل ونشرب ونقضى كل حاجتنا فى أوضة متكملش ٣ متر، الرئيس قال اللى يتوفر فيه شروط وحدة سكنية هياخدها ولو لفيتوا مصر من إسكندرية لأسوان مش هتلاقى حد أقل مننا يا ريس، واحنا بعد كل دا يقولوا الشروط لا تتوفر فيكم لما قدمنا فى وحدات الإسكان الاجتماعى لأننا غير موظفين».
وتتابع: «حالتنا تستحق وحدة سكنية من اللى أعلنوا عنها وإحنا أولى بالرعاية والحالات القاسية من الموظفين، الحقونا قبل ما نصاب بالأمراض ويبقى بيتنا على الرصيف».
