يخوض الفنان حمادة هلال السباق الرمضانى بمسلسل «قانون عمر» والذى يذاع حصريًا على شاشة إم بى سى مصر، من خلال شخصية عمر المدنى التى أثارت تعاطفًا كبيرًا فى الشارع وعلى صفحات السوشيال ميديا، «البوابة» التقت «هلال» ليكشف خلال حوار صحفى معه عن كواليس موافقته واختياره للعمل، وتحضيره لهذه الشخصية، وهل يخشى المنافسة فى رمضان أم لا.. وإلى نص الحوار..
■ سبب اختيارك لمسلسل قانون عمر لتخوض به الماراثون الرمضانى؟
- وافقت على المسلسل أو ما قريت الفكرة، وقبل أن يكتب السيناريو، وكان فى البداية عندى شوية تخوفات أنه يكون ملمس مع مسلسل «طاقة القدر»، ولكن تجنبنا كل حاجة ممكن توجد أى تشابه حتى ولو بسيطًا، والحمد لله فداء الشندويلى لما عرف إن الفكرة عجبتنى كتب القصة ورسمها عليا بشكل جيد جدًا.
واللى شدنى أكتر فى المسلسل هو العنوان «قانون عمر»، وهو هيظهر فى الحلقات المقبلة، وهو السطر القانونى اللى نتمنى يتوجد زى فيلم «أريد حلا»، لأن فى ناس كتير بتدخل السجون ظلم وإحنا هنا مش بندين أى جهة ولن بيكون لمشكلة فى القانون نفسه والورق اللى قدامه، وأيضًا المسلسل بيلقى الضوء على معاناة أى شخص بيتسجن حتى لو أخد براءة، وأثبت براءته إلا أن نظرة المجتمع له بتكون قاسية، وقصة المسلسل ليست مكتوبة عن شخصيات واقعية بعينها ولكن أحداثها هى أحداث بنعيشها وبيمر بيها الناس والمجتمع، وعايز أقول إن فيه ناس محترمة جوه السجن، وفى ناس أقلمت حياتها إنها تعيش جوه السجن وعارفة قواعد وأسلوب التعامل داخله.
■ كيف تم الاستعداد للعمل؟
- خسيت ولعبت رياضة كتير، عشان جسمى يكون مناسبًا، رغم أنى بعشق الأكل بس عملت رجيم عشان اللياقة البدنية، وتحاورت مع عدد كبير من الضباط اصدقائى، عشان أتعرف أكتر على أجواء حياة المساجين، وحالة السجون والمخرج كمان كان بيسال دايمًا، وأيضا استعنا بخبير ومستشار قانونى حتى لا نقع فى أى أخطاء.
■ هل شخصية عمر معقده؟
- شخصية عمر ما فيهاش فلسفة أو اصطناع ودائمًا لدىّ قناعة بأن التلقائية أهم من التمثيل، لأنه أحيانًا التجويد والفزلكة بتضيع الشخصية وبتخليها مصطنعه أكتر، ولكن الموضوع بالنسبة لى مرهق نفسيًا، لأننى تعاطفت مع الشخصية واندمجت معاها، وأضاف: «انكسار الشخصية أثر عليا فى حياتى الطبيعية خاصة أثناء فترة التصوير»، وتابع: «إحنا مش بنعلم البلطجة ولا عمر المدنى بلطجى، لأن المسلسل عمره ما هيقدم مصر بشكل سيئ، وإنما بنقوم بعمل معالجة درامية للأزمة من خلال مثلًا إلقاء الضوء على قوانين محتاجة تتعدل، بالإضافة إلى رسالة المسلسل أيضًا أن هناك القانون الإلهى العادل دائمًا، فدايمًا ربنا يمهل العبد ويكون انتقامه كبيرًا من الظلمة.
أما المشاهد اللى تعبتنى فهناك مشهد أكشن وفى البروفة بتاعته ضربت الشخص اللى قدامى غلط وتعبت وجالى إصابة فى رجلى، ووقفنا التصوير ٣ أيام، أما المشهد اللى تعبنا برده هو أثناء وجودى فى المحكمة، واستغثت «أنا مظلوم وأمى هتموت»، صوتى راح نهائى، وبسببه لم أغنِ التتر، وصوتى اتنبح لمدة أسبوع، وفيه مشاهد هيلاحظ فيها هذا الأمر إن الصوت رايح تمامًا، وأعتقد أنه هذا التأثير الحمد لله كان يتناسب مع طبيعة الأحداث وشخصية عمر، وأن له أثرًا إيجابيًا أكثر.
■ كيف ترى ردود الفعل حول العمل؟
- الحمد لله المسلسل حقق صدى واسعًا، الشخصية لمست مع فئات كتير من المجتمع، والمسلسل يخاطب كل الفئات لأن عمر مدنى مهندس ميكانيكا ومثقف ومتعلم، ولكن بيتورط فى مشاكل وبيتظلم، فالظلم وإحساس القهر بيوصل لأى نوع من الجمهور. والمسلسل أحداثه فيها الكثير من المفاجآت، وأضاف: «الحمد لله ربنا وفقنا ووفق شركة الإنتاج فى اختيار فريق عمل المسلسل، من ممثلين لإسكريبت لإخراج، وإيمان العاصى هى هى البنت الجميلة الطيبة الهادية واللى بتركز فى شغلها وشايفها مختلفة جدًا المرة دى عن حماتى بتحبى فهى دايمًا بتتطور فى شغلها.
■ المسلسل ينتمى لأى نوع من الدراما أكشن أم تراجيديا؟
- نوعية المسلسل عبارة عن عمل درامى اجتماعى فيه كل حاجة، الأكشن موجود بجرعة معينة، وفيه أيضًا «ساسبنس» والتشويق موجود، فيه أيضًا خطوط للكوميديا، لأننا بنقدم تلاتين حلقة لازم أنوع للمشاهد المحتوى حتى لا يمل، والشىء الوحيد اللى المفروض يتواجد طوال الحلقات هو «الساسبنس».
■ هل يخشى حمادة هلال المنافسة؟
- أنا بعشق المنافسة وبحبها وبحترمها وبرضى بيها، وبدعى لنفسى قبل خوض التجربة إن ربنا يوفقنى، وبتمنى لزملائى كمان النجاح، واللى بيكون هممنى فعلًا هو أن الناس تحس بمدى التعب والمجهود الذى يبذل حتى يخرج العمل بهذا الشكل.
■ هل الترند بيفرق مع حمادة هلال؟
- المسلسل لا يُذاع على اليوتيوب، ولكن إحنا تريند على شاهد، واحتللنا أكبر بحث على جوجل، إم بى سى عندها موقع شاهد، وطبعًا اليوتيوب مهم، ولكن هذه سياسة شركات لا علاقة لى بها، والحمد لله إحنا بنتذاع على قناة متشافة فى مصر والوطن العربى.
■ الحصرى يخدم العمل أم يضره؟
- أنا مسلسلاتى السابقة اللى قدمتها كلها حصرى والحمد لله نجحت، وما جربتش المتزامن عشان تكون إجابتى عن تجربة، ولكن بشكل عام نجاح الحصرى أصعب من نجاح العمل المتزامن، يعنى هو صعب وليه «عزة»، لأن العمل المتزامن هيتشاف هيتشاف، لكن الحصرى الجمهور اللى بيدور عليه، وعمومًا برده هذه سياسة شركات الإنتاج.
■ الجديد لديك الفترة المقبلة؟
- مركز فى كليب استكتروك على اللى نازل فى العيد وخلصت تصويره، وفيه سنجل هصوره الفترة الجاية بعد العيد إن شاء الله، وأضاف بحب الغناء والتمثيل بنفس القدر.
