نشر الشاعر سالم الشهباني، على صفحته بموقع التواصل الاجتماعي فيسبوك، قصيدة بعنوان "عدى النهار يا خال"، لرثاء الشاعر الكبير الراحل عبدالرحمن الأبنودي في ذكرى ميلاده.
وكتب الشهباني على صفحته: "إلى الخال الأبنودي. رحمة الله عليه. تنشر لأول مرة في ذكرى ميلاده الذي يوافق 4/11".
عدى النهار يا خال
عدى النهار يا خال؟!!!.. صدقنى ما عداش
لسه النهار حي
ولسه الضى بيصاحب.. خطانا الجاي
لسه العيون ع الغنا قادره.. تنطق كلام متحاش
كل الخلاف.. عندك خلاف
كل القضايا.. بالزمن سقطت.. وانت اللي شعرك عاش
عملت منه مراكب.. يا عمنا وبيوت
ومشيت تغنى والغنا مبسوط
حكيت لطوب الأرض عن "يامنه"
وعملت منها.. الشعر والسيرة
ف ناس تقدم شعرها قربان
وتمدح السلطان
وتضلل الإنسان..
وتزيف السيرة
وانت اللي شعرك كان
ضل الفقير ف الأرض..
توب الفقيره
كان الشجر والطين
كان النخيل يا خالنا وجريده.. كان الحصيرة
في ناس تعيش.. للشعر
وناس.. تعيش بالشعر
وناس تعيش م الشعر.. عاملينله تسعيره.
والدنيا ماشيه ومين هيخلفها
واللي عرفها رماها ورا ضهره
واهي ناس توصل ناس
والدنيا ما دايماش.
عدى النهار ياخال..؟!!!.. صدقني ما عداش
