محمد مصطفى، يعمل بائعا بسوق حلوان، أب لأربعة أطفال، ٣ بنات وولد، أصابهم المرض والفقر، وكتب عليهم أن يعيشوا طوال حياتهم بتليف رئوي، إضافة إلى الروماتيزم وتلف صمام القلب.
ويقول «مصطفى» الذى لا تتخطى يوميته الـ ٧٥ جنيها باليوم: «عندى ٣ بنات وولد عندهم تليف رئوي، ومش عارف أعمل إيه روحت بيهم للمستشفيات الحكومية، وكتبوا علاجا مكلفا جدا، وقدمت شكوى لوزارة الصحة، قالولى لازم تقعد بيهم فى المستشفى، وتكلفة العلاج ٢٨٥٠ جنيها فى الشهر وأنا مش معايا المبلغ ده».
ويوضح: «المرض عبارة عن أزمة بتيجى من وقت للتانى لكل عيل، ومش بقدر أروح بيهم المستشفى كل ما يجيلهم الأزمة، وعلاجهم بيستغرق فترات طويلة لأنه مرض مزمن، ومفيش لحد دلوقتى تحسن لأى حالة من الأربعة، «منة» حالتها اتدهورت، وجالها روماتيزم على القلب بسبب المرض، و«نور» عنده كهرباء زيادة وبيظهر عليه تصرفات غريبة، وبيتابع مع دكتور نفسي، وبالنسبة لـ«مروة وحبيبة» فهما محتاجان تحاليل الواحد بـ «٥٠٠٠ جنيه».
ويواصل: «نفسى يكون ليّ مصدر دخل ثابت، علشان أقدر أصرف على علاجهم، وبتمنى لو حد يقدر يتكفل بعلاج ولادي، أو وزارة الصحة تعالجهم على نفقة الدولة، ونفسى الدولة تقف جنبى».
