روائح كريهة ومياه تحاصرهم، وجدران آيلة للسقوط، ومعاناة ورعب يعيشها سكان عمارات المستقبل بحى العجوزة، وهو ما دفعهم لتقديم عدة شكاوى إلى المسئولين فى الحى، لإنقاذ أرواحهم من الكارثة التى تنتظرهم.
تقول كوثر محمد، 60 عاما، من سكان المنطقة، إن مياه الصرف تهدد بسقوط العقار، مؤكدة «فى الأول قالوا إن السبب خطأ وأنهم مضطرين لإعادة ترميم أساسات شبكة الصرف الصحى، فقلنا ماشى بعد كده الموضوع اتغير والوضع بقى صعب والمياه تجرى تحت العمارات، وذهبنا لرئيس الحى، قال فضوا الشقة اللى عندها البير وبقالنا سنين على الحال ده».
حال «كوثر» كان أخف من حال جارتها «أم محمد» التى قالت: «مشكلتنا تراكم المياه وانتشار الحشرات والثعابين والرائحة الكريهة التى تدخل علينا المطبخ، وخايفين على نفسنا من سقوط العمارة علينا، واشتكينا جات نائبة رئيس الحى، وقالت هنيجى نهد الشقة علشان يطلعوا المواسير ويصلحوها ومحدش جه سأل فينا، وبرضه لسه الميه بتطلع علينا من تحت الأرض، ورغم أن الموضوع صعب عليا أنا وجوزى الكفيف لأننا ملناش مكان تانى نقعد فيه، وكل اللى أنا عايزاه يجبلنا شقة نقعد فيها مؤقتا لحد ما يخلصوا الإصلاحات اللى لسه مبدأوش فيها».
«بقالنا سنين على الوضع ده ومحدش واخد باله مننا مش عايزين حاجة من البلد دى غير إننا نعيش كويس، خايفين البيوت اللى شبعانة ميه تقع علينا، ومفيش حد من المسئولين ينقذنا من المرار اللى إحنا عايشين فيه».. هكذا عبرت «ليلى» عن حالها قائلة: «أنا عايشة مع أمى ونعانى من نفس المشكلة وروحنا الحى اشتكينا بعتولنا عمال نضفوا البير وشالوا المياه بس الحال كما هو عليه ومفيش حاجة اتغيرت والمياه رجعت تتراكم تانى».
