تمارين كل يوم أكثر من ٨ ساعات، غير كمان المذاكرة عشان المدرسة، ورغم كل المتاعب استطاعت بطلتنا الجميلة، فاتيما أحمد نبيل دعبس، أن تحصد لقب ثالث بطولة الجمهورية، جمباز فنى آنسات، تحت ٧ سنوات، وحصلت على الميدالية البرونزية.
البطلة «فاتيما» كانت بتلعب البطولة كلاعبة لنادى الغابة، تحت إشراف الكابتن محمد دياب، المدير الفنى، المجتهد الخلوق، والكباتن مصطفى وإبراهيم وأحمد.
حكاية فاتيما مع اللعبة التى بدأتها من ٩ أشهر، تدربت بجد، خاصة فى الشهر السابق البطولة، وهذه أول بطولة تشارك فيها فى حياتها. فاتيما اختارت لعبة الجمباز من نفسها وحبتها وتتابع أبطال الجمباز على «اليوتيوب»، البطلة «فاتيما» فرحانة جدا طبعا بالميدالية الأولى فى حياتها، وقالت لبابا أحمد دعبس، إنها هتجيب ميدالية ذهب فى البطولة الجاية.
وكمان نقولكم على سر عن الأمورة «فاتيما»، بابا أحمد قال لينا عليه «هيه كمان مبتحبش الكرتون، ونجمتها المفضلة دنيا سمير غانم، وبتعشق حماقى وتامر وشيرين وعايزة تبقا مهندسة أو مصممة أزياء وبتحب الرسم والموسيقى، وعايزة تخلى مصر دولة عظيمة وتمثلها فى الأولمبياد كمان»، البطلة فاتيما بسم الله عليها شاطرة كمان فى دراستها «kg٢» بمدرسة مصر الذكية لغات.
