رغم تعدد المناشدات التى قدمتها صفحة «صوت الناس» للمسئولين فى حى العجوزة بإصلاح السلم الكهربائى أعلى مزلقان أرض اللواء، إلا أن الوضع ما زال قائما كما هو، فبعد إصلاح السلم سرعان ما يعود مرة أخرى للتوقف، وناشد الأهالى النائب عبدالرحيم على، للتدخل مرة أخرى لوضع حل جذرى للمشكلة.
يقول محمود همام، موجه بوزارة التعليم: «الوضع بقاله سنين من ٢٠١٥ يصلحوا السلم يوم.. وبعدها يعطل ١٠، مفيش رقابة ولا متابعة من الحى، فبعد وصول الشكوى للحى، يجى العمال ويشغلوا السلم، وتانى يوم يقف، ويضيف الناس بتقف قدام الأسانسير بالعشرات، كأنهم فى طوابير عيش، كبار السن فى المنطقة كتير، وصعب عليهم يطلعوا السلم على رجلهم، فبالتالى بيفضلوا واقفين منتظرين دورهم ربع ساعة عشان يعدوا».
ويتابع: «قالوا إن سبب تكرار العطل عدد الناس اللى بيستخدموا السلم، وخاصة وقت خروج طلاب المدارس، وهذا غير صحيح، السبب هو الإهمال وعدم الصيانة، والحى مش بيغير المكنة الخاصة بتشغيل السلم، فطبيعى السلم يقف كل يوم، لو ١٠٠ واحد استخدمه، لكن فى حالة تغيره أو وجود صيانة متكررة السلم هيشتغل يوميا، سلم مترو الأنفاق الكهربائى بيستخدمه الآلاف، ومع ذلك لو عطل فى دقايق يتم تصليحه، وبيعطل كل فين وفين، لإن فيه صيانة دورية ومتابعة، أما هنا ولا حد بيسأل».
كانت صفحة «صوت الناس» طالبت المسئولين لأكثر من مرة بإيجاد حل جذرى لهذه المشكلة، ولكن بدون استجابة.
