يحلم أهالى «مدينة المستقبل» بتملك المساكن التى يقطنون فيها، وترجع أزمتهم لأكثر من ١٠ سنوات فيما عرفت بمشروع جمال مبارك، حيث تم بناء وحدات سكنية باسم المستقبل، لتطوير شارع حسان حسين.
تقول «إيمان ربيع» من سكان «المستقبل»: «احنا اتولدنا هنا فى العجوزة وعشنا فيها لحد ما عملوا حاجة اسمها مشروع جمال مبارك للتطوير، شالونا من مكاننا فى حسان حسين، وقالوا هنديكم شقق غيرها، ووافقنا لأن مكناش نقدر نعمل حاجة، بنوا لينا وحدات اسمها المستقبل، الحى بيحصل مننا كل شهر ٥٠ جنيها صيانة واللى ميدفعش يرفعوا عليه قضية، وأما رفضنا ندفع جابولنا الشرطة ودفعنا فى المحكمة، ولا بيعمل صيانة ولا بنشوفهم غير وهما بيخبطوا يلموا الفلوس، بعد ما اتنقلنا عرفنا إن الشقق دى هترجع تانى للمحافظة ومش هنتملكها بمجرد ما صاحب الشقة يموت، يعنى خرجونا من ملكنا وبيوتنا وأدونا شقق إيجار وكمان مؤقتة، الوحدات دى عبارة عن ١١ بلوك بعد كام سنة لما أصحاب الشقق تتوفى هننطرد فى الشارع، جيل كامل ومئات من السكان مش هيلاقوا مكان يعيشوا فيه، لإن المحافظة أو الحى هترجع تاخد مننا الشقة، احنا مش طالبين أكتر من حقنا، زى ما كنا مالكين شقق ومحلات وخرجونا منها يملكونا المكان البديل اللى عايشين فيه».
يضيف «لاشين» أحد المتضررين: «احنا خدوا مننا بيتين بمحلين وأدونا شقة إيجار ورفضوا يدوا شقة لعمى يعيش فيها، يعنى بيخدوا البيوت عشان يعملوها جنينة، إحنا هنعيش فى جناين، حتى الجنينة اللى اتشردنا بسببها قفلينها، وكاتبين فى العقد لا تؤجر ولا تباع ولا تملك احنا هنعيش فين ونجيب شقق إزاى واحنا مش عارفين ناخد حقنا».
يتابع عادل محمد: «عيلتنا هنا من الخمسينيات عايشين هنا، كان عندنا بيت وكلنا عايشين فيه، وكان عندى محل كبدة، طردونا من البيت وقالوا هنديكم شقة، خدنها شقة إيجار عيشنا فيها كلنا، واستبدلت محل الكبدة بعربية كبدة واقف بيها فى الشارع يعنى لا قدر الله لو حد اتوفى من أصحاب الشقق هيطردوه فى الشارع، زى ما طلبوا لينا الشرطة أما رفضنا ندفع للحى الصيانة بسبب الإهمال».
