رئيس مجلس الإدارة ورئيس التحرير
عبد الرحيم علي
رئيس التحرير التنفيذي
إسلام حويلة
ads
ads
ad a b
ad ad ad
دينا المقدم
دينا المقدم

المهم يسقطوا السيسي

الأحد 21/يناير/2018 - 10:01 م
طباعة
فى أول مقال ليّا فى "البوابة" اعترفت واعتذرت بأنى شاركت فى 25 يناير، وكان دورى الحزبى فعالا لقيام هذا الحدث الذى ما زلت أراه هاما، أدى إلى حراك سياسي ومجتمعى بشكل كبير،  وأحيا الجثة الهامدة.
وبعترف كمان أن 25 يناير شالت غطاء البلاعة من علينا كلنا وكشفتنا على حقيقتنا كلنا بلا استثناء، أنا بس مستغربة إنتوا ليه مستغربين من العطن إللى إحنا فيه.. ده غير نتيجة مهمة جدا وهى جلب الإخوان للحكم وتدمير الأرضية اللى عاشوا يفرشوها أكتر من 80 سنة علشان يوصلوا للحكم.
يعنى بالبلدى كده لو كنا قعدنا نقول فى الشارع للناس البسيطة إن الإخوان وحشين وهيدمروا مصر مكنش حد هيصدقنا وكانوا هيضربونا بالجزم ويتهمونا بالكفر وإننا ضد تطبيق شرع الله.
فبصراحة يعنى 25 يناير اختصرت الطريق وقطعت لنا ديل الحية اللى كانت هتلف على رقبتنا كلنا فحصل خير يعنى وآدينا لسه شايلين الطين.
المهم دلوقتى إحنا عاوزين إيه؟ يعني لما عملنا 25 يناير و30 يونيه، كان الهدف إيه؟ إن مبارك وحش فنسقطه، والسيسي جميل فننصبه رئيس جمهورية؟  هو إنت بتختار بنطلون لسيادتك ولا بتختار رئيس لبلدك؟!
يعنى مشكلتكم الشخص ولا الإنجاز أحسن مبقتش فهماكوا!
أصلها لو مشكلة شخص فحضرتك جواك مبارك صغير قد كده كرمز للفساد؛ لأنك لسه فاسد رغم أنك خرجت ضد راجل فاسد.
ولو مشكلتك إنجازات فالسيسي مش ساحر علشان يخلصك من قهرك وفسادك ومرضك وفقرك فى 4 سنين.. يا راجل يا مؤمن ياللى بتصلى يوم الجمعة وإنت لسه بترتشى وتسب الدين فى نهار رمضان عادى كده!! وبتموتنا وتدمر بلدنا. 
ده ربنا نفسه لما قرر يخلقك ويخلق الكون كله استغرق 6 أيام وهو القادر على أن يقول للشيء كن فيكون، علشان يعلمك أن كل حاجة بميعاد وكل حاجة تاخد وقتها، تقوم إنت عاوز إنسان عادى زيى وزيك يحللك المصايب السودا دى كلها فى 4 سنين.
أنا مش فى محل لشرح واستعراض إنجازات الراجل المحترم ده؛ لأن لو حضرتك مش شايفها فعندك مشكلة فى بصيرتك خاصة وإن أنا كنت فى مكانك فى يوم من الأيام.
مشكلتنا الأكبر دلوقتى فيه ناس مش فارق معاها البلد ولا مستقبلها ولا أمنها ولا حتى مستقبل أولاده، هو مشكلته كلها فى شخص السيسي المهم يمشى، حاضر نمشهولك يا خبير قيادة الدول إنت.
بس وبعدين نجيب مين بقى؟! 
فكر معايا كده  نجيب مثلا "فلان إياه " ولا "فلان التانى"؟! وهما دول اللى على الساحة دلوقتى.
خلاصة القول علشان معندناش وقت، ورانا بلد بنبنيها، ورئيس بيبذل أقصى جهده علشان حضرتك تقعد فى بيتك آمن، وتروح شغلك وتعلم أولادك وتلاقى دولة من أصله تعيش فيها.. وعلشان ورانا مشاريع بتتبنى وعلشان ورانا إرهاب بنتخلص منه وعلشان ورانا مستقبل.
عزيزى المواطن المصرى المعترض على الشخص فقط، مش عاوزين نسمعك مش فاضينلك، لو عندك مبررات لإسقاط هذا الرجل اتفضل اطرحها؛ يعنى يكون راجل فاسد مثلا ولا عاوز يورث حكمه ولا أنك مش لاقى تاكل فى عهده مع أن ده مش مبرر؛ لأنه بيصرفلك تموين وأنت بتروح تبيعه وأصلا العالم كله عنده أزمة اقتصادية، أو أنك مش لاقى شغل مثلا وده مش مبرر لأن السوريين نزلوا مصر وعلموا على وشك بالعرض، أو أنك مش لاقى بنزين لعربيتك تروح شغلك وطوابيره ما بتخلصش، أو أنك مش لاقى مستشفيات تتعالج فيها، أو أن ولادك مش قادرين يمشوا فى الشارع علشان مفيش أمن، أو أن الدول الأخرى بتهينك ومش عملالك حساب، 
أو أن عندك أزمة خبز وأنابيب غاز، أو أن عندك أى أزمة تواجهها فى حياتك اليومية؟!
حضرتك تقدر تدور وتفتح وتعرف كل مجال فى البلد اتعمل فيه إيه، وهل الإنجازات دى مناسبة فى 4 سنوات ولا لأ بعد دمار سنوات كتير؟ 
لو ملقتش اسمحلى أقولك أنك مواطن فاضى، بس إحنا مش فاضيين ورانا دولة بتتبنى.
"
هل تتوقع تراجع الودائع البنكية بعد خفض سعر الفائدة ؟

هل تتوقع تراجع الودائع البنكية بعد خفض سعر الفائدة ؟