«القلب من الغدر بيك لساه موجوع، والرحال ليك تطيب الموجوع، الحاج جمال السعيد: «٣٠ سنة وأنا فى المكان دا كل مولد مش بغيره، جات عليا ناس وماتت ناس وأنا هنا بعتذر للحسين عن اللى ميعرفوش قيمة الإمام طبيب القلوب، اخدت العادة عن أبويا اللى هم فى حب الحسين، وآل البيت، حكايتى تبدأ من لما هربت من البيت وسبته لما أبويا رفض يخدنى فى المولد وأنا عندى ١٠ سنين، وقالى لسه صغير، بس من كتر كلام أهالينا عن مقام الحسين والجمال فيه مقدرتش استنى للعام اللى بعده، خدت يومها ٢ جنيه من غير مايعرفوا من البيت وركبت القطر وقولت للكمسارى أنا رايح لسيدنا الحسين ومش معايا غير دول، رفض ياخدهم مني، ولقيت شيخ بيبصلى وابتسم وقعدنى جنبه قالى كلمة مازالت متعلقة فى ذهنى «من كان فى حمى الكرام لا يضام ياولدي» الحسين لا يتخلى عن محبيه، وخدنى المولد وقعدنا فى المكان اللى جالس فيه أنا وأنت والأحباب ومن يومها وأنا كل سنة فى المكان دا، مشوفتش الشيخ من يوم ما رجعت معاه ووصلنى البيت بعد المولد.
