مئات من ساكنى حى بين السريات يعانون يوميًا من أزمة غلاء الأسعار وارتفاع أسعار اللحوم، الأهالى قدموا مناشدة للنائب عبدالرحيم على بعمل شادر للمنطقة؛ يهون عليهم غلاء الأسعار، ويوفر السير يوميًا مسافة على الأقدام ويرحم كبار السن من متاعب المسافة والغلاء.
يقول محمد صبحى أحد سكان المنطقة: «الناس واخدة فكرة عن بين السريات أنهم من أغنى الناس ودا غير حقيقي؛ لأن المنطقة متقسمة لشقين الأكبر منهما محدودو الدخل أو معدومو الدخل كمان، المنطقة محافظة على مكانتها القديمة، وأنها كانت محل لكتير من الأعيان بدليل أنك تقدر تقول إن المنطقة الوحيدة فى مصر مفيش توكتوك بيدخلها لحد دلوقتي، بس المشكلة اللى بتقابلنا ونتمنى حلها من النائب عمل شادر ثابت للمنطقة، أنا يوميا بمشى مسافة كبيرة عشان أجيب الخضار واللحمة من مسافة بعيدة، بسبب أن محلات الخضار واللحمة بتغلى الأسعار هنا، عربيات الخضار واللحمة المدعومة من الجيش بنضطر نمشى مسافة، فى ناس من كبار السن بيضطروا يجيبوا حد بفلوس يشترى لهم الخضار بسبب المسافة».
ويضيف: «إحنا عارفين أن النائب على قدر المسئولية، وأن مشاكل المنطقة بدأت تتحل وإحنا بدأنا نشعر بدا، وأهو واضح أما سألتنى المشاكل قولتلك مفيش غير الفرن وتم حلها من النائب زى ما قولت، فبناشد الدكتور بجوار الحى يكون فى سيارة ثابتة أو شادر ثابت يوميا وبأسعار مخفضة رحمة لينا من جشع كتير من التجار».
