طالب بأولى كلية إعلام، فكر فى نشر السعادة والبهجة فى نفوس المواطنين، ومحاولة إخراجهم من الضغوط التى تحيط بهم.. فارتدى زى «بابا نويل» وقام بمغامرة فى الشارع.
يقول كيرلس ماهر، صاحب الـ١٩ عاما: «حبيت أفرح الناس بشخصية بابا نويل، خاصة وأنا شايف إن الناس مضغوطة ماديا، فقررت إنى أفرحهم ولو بحاجة بسيطة»، لافتا إلى أنه العام السابق ارتدى ملابس «سانتا كلوز» وأخذ يجوب الشوارع ويوزع الهدايا على المواطنين.
ويضيف: «قررت السنة دى أظهر بشكل مختلف، أظهر بشكل بابا نويل المصرى، وأركب «توك توك» وأتوبيس، وأكون عامل فى بنزينة، وأوزع على كل الناس الهدايا والشيكولاتة».
ويتابع «ماهر»: «كنت معتقدا بأن الناس مش هتحب الجو ده، لكن لقيت كل الناس مبسوطة، وبقوا يتصوروا معايا، خاصة لما كنت بسوق «التوك توك» لقيت إن فى ناس حابة تركب معايا، وهدفى هو إسعاد الناس».
وأشار: الفكرة متعبتش فيها لوحدى، لكن فى صديق اسمه «جينو» تعب معايا فى الميك أب، بحيث أطلع شبه «سانتا كلوز» غير الحشو اللى كنت عامله فى جسمى عشان أنا رفيع وبابا نويل معروف عنه إن جسمه مليان، وكانت أكتر حاجة فرحتنى هى سعادة الناس والأطفال، وكل سنة هاظهر بشكل جديد عشان أفرح الناس ولو بحاجة بسيطة».
