حسام صاحب الـ35 عاما يجلس على رصيف بميدان الجيزة.. يصنع بيده زيت الصبار، ويقول لـ"البوابة نيوز" «الفرشة دى فاتحة بيتي معنديش مصدر رزق غيرها وبصرف منها على ولادي محمد وحنين، بفرش الساعة 9 الصبح وبمشي على الساعة 7 بالليل وعلى حسب تساهيل ربنا ببيع 20 أو 30 برطمانا في اليوم».
ويضيف حسام: زيت الصبار مفيد للشعر والبشرة لأنه يغذي الشعر ويطوله، مشيرًا إلى أنه يصنع الزيت بيده من نبات الصبار الطبيعي دون إضافة أي مواد حافظة وتظهر نتيجة الزيت خلال 5 أيام أو أكثر حسب نوع الشعر.
وتابع: «بسافر إسكندرية عشان أجيب نبات الصبار والزيوت الطبيعية، وسعر برطمان الصبار من 15 إلى 25 جنيها على حسب الزبون ما عايز، ومش بقول لحد لا أبدًا حتى لو ش معاه فلوس خالص بديله البرطمان ببلاش الناس ظروفها تعبانة وبعمل كده لربنا مش عشان اى شئ».
وقال حسام: «بحلم بمحل صغير يريحني من البهدلة اللي أنا فيها حد يقومني شوية وحد يقعدني شوية، لما بقعد قدام عمارة أو محل صاحبه بيتحكم فيا كأنه أشترى الشارع».
محمد الشهير بحمادة يجلس بعد عدة شوارع من زوج شقيقته حسام ليبيع زيت الصبار، ويقول «عندي 5 ولاد وكنت شغال في المحارة لكن عملت عملية في دراعي ومقدرتش أكمل في شغل المحارة، وحتى مش بقدر أشتغل بيدي في الصبار بعمل حاجات خفيفة».
ويضيف: «بقبض باليومية وبشتغل 12 ساعة في اليوم لكن مش بقدر أكفى مصاريف البيت وأبنى الكبير كريم عنده 11 سنة بيشتغل جنب دراسته ميكانيكي عشان يساعدني، لكن بحلم أنه يكمل تعليمه ويتوظف هو وأخواته، ونفسى البلدية تسيب الناس تأكل عيش».
