«أيوه الفوووووووووووووووول، يا عم كرم كيس فول وكيس بليلة»، «يوميًا يسمع سكان مدينة عبود تلك الجملة بمجرد مرور «محمود خلف» الشهير بـ«كرم» بعربة الفول تفتح سيدات المنطقة الشبابيك وتنهال الطلبات على بائع الفول.
ويقول «عم كرم» صاحب الـ٤٠ عامًا: «ورثت تلك المهنة أبًا عن جد، اشتغلت فيها من وأنا عندي ١٠ سنين مع والدي وبعدين بعد ما عديت الـ٢٠ سنة استلفت من قرايبي عربية «كارو وحمار» وفضلت شغال عليها ١٥ سنة لحد ما ربنا كرمني من ٣ سنين واشتريت عريبة ربع نقل». وتابع: «بصحي كل يوم الساعة ٣ الفجر أبدأ أحضر الفول والبليلة وعلى بركة الله أبدأ الشغل وأخلص لف بالعربية على الساعة ٣ العصر وبعدين أروح اشترى الفول الناشف من الساحل بروض الفرج وأعمله بإيدي والبليلة برضو أنا اللي بعملها أخلص تحضير شغل تاني على الساعة ٨ بليل وبعدين أروح لعيالي»، مضيفًا «بيبع كيس الفول أو البليلة بجنيه وسندوتش الفول بجنيه وربع الناس تعبانة مش ناقص على الغلبان أن الفول كمان يبقى غالي».
واستكمل «بأخد أجازة في العيد بس، أنا عامل زي الغريب مع عيالي يدوب بروح على النوم، ما أنا عندي ٧ عيال بعلمهم لو ريحت يوم هيأثر معايا».
