انتقد المخرج محمد دياب فعاليات مهرجان القاهرة السينمائي في دورته الـ39 والتي تم إهداؤها لاسم الفنانة شادية.
ودشن دياب عبر صفحته على موقع التواصل الاجتماعي "فيس بوك" هاشتاجا بعنوان "إحنا أسفين يا هاني أبو أسعد" وكتب خلاله قائلا: "القاعة وقت عرض فيلم الافتتاح فضيت تمامًا، رغم أنه فيلم هوليوودي وإخراج مخرج عربي.. طبعًا دي فضيحة معبرة مش عن مهرجان القاهرة لوحده بس عن صناعة السينما في مصر الحقيقة أن نجوم السينما في مصر معظمهم مبيتفرجوش علي سينما خالص.. بتاتًا.. يعني حتى إم بي سي تو مبيتفرجوش عليها.. اللهم إلا لو في فيلم حد زقهولهم وقالهم ده هايل لو عرفت تمصره، ساعتها اأاقيه جايلي بالفيلم وعاوز يعمل زيه".
وتابع قائلا: "ممثلين مشهورين كنا بنبقى بنشتغل مع بعض ومتحمسينلي جدا كمخرج واكتشف في وسط الشغل أنه مشافش حتى الأفلام اللي أنا أخرجتها! طب والله العظيم أني أخلي ممثل في هوليود يتفرج على فيلمي أسهل وأسرع من أني أخلي ممثل في مصر يتفرج عليه".
وأضاف: "كان فيه مهرجان مصري قريب قايم على اختيارات صناع السينما والتليفزيون في مصر وكان معايا صديق أبهرته بقدرتي على التنبؤ بكل الجوايز، ولما سألني إزاي عرفت؟ قولتله بسيطة بما أن محدش من اللي بيصوتوا دول بيتفرجوا على سينما فهيقيموا الأفلام من التريلر، فاللي شكله تصويره حلو في التريلر هياخد أحسن تصوير واللي شكله ممثل كويس في التريلر هياخد أحسن ممثل وهكذا.. وتنبؤاتي كلها صدقت".
واستكمل قائلا: "بالنسبة لمهرجان القاهرة، فطبعًا المهرجانات هي مكان الناس اللي بتحب السينما، وطبعًا تواجد النجوم مهم بس على الأقل تبقى نص القاعة ناس مهتمة بجد بالسينما، تقريبًا محدش من السينما المستقلة أو الناس اللي بتشارك في مهرجانات اتعزم أصلًا".
وعلق في نهاية حديثه قائلا: "الرد كاربت معموله عشان تسوق للمهرجانات، مش المهرجانات معموله عشان تسوق للرد كاربت!! #اسفين_يا_هاني_ابو_اسعد".
