من وقاحته
الشجر دايما بيستر ع اللى تحته
تبقى دى لحظة صراحته
يخلع الضل اللى شحته
ويلم ف كتافه العراض
ويميل وجع
مش أعتراض
الأيه بتقول معنيين ويجوز تلاته
والخوف غتاته
واللى واجه باستماته
صد ريح الخوف بجرأه
كان مخبى بهجته
وماخدش فرقه
وقال في وش الكل لأ
كان هينطق.. بس طق
مين اللى صدق..
نص تخمينه
شاف الولى بعينه
بيجرى ع الميه
دفع الدماغ ديه
وفى المقابل مات
ع الأرض أغنيه
متبعتره لفتات
وهناك على الدكه
مسمار منغصنى
الجوع بيقرصنى..ويزرق القرصه
وينتهز فرصه
ويساوم الاسئله
على حل كام مسئله
بحلول رومانسيه
قال الحكيم..
- أي نو
العشق هيخبوه
ويقفلوا الشبابيك
الحرب كان تكتيك
مايخرش الميه
والفكره نظريه.. قد تقبل التغيير
في مصانع التدوير
تطلع فوقين السير
متغلفه بإقناع
والحفل لو متذاع
خلصت الليله
اغزل مثل عالنول
وازعق بحكمه وقول
مش طالبه لمناهده
وركن ضليله افضل من الصهده
مات النهارده..
زى اللى قبله فطيس
المسئله بسيطه
مش طالبه للزيطه
ولا قلق وصويت
يادوب تدوس عـ الزر..
وتبعت التصويت
