استغاث عبدالجواد مصطفى، والد القتيل إسلام عبدالجواد مصطفى، بالمسئولين بعد مقتل ابنه في منطقة القوصية بمحافظة أسيوط.
وقال، خلال مداخلة تليفونية مع الإعلامي محمد الدسوقي رشدي ببرنامج "آخر النهار" والمذاع عبر فضائية "النهار"، اليوم الاثنين: "أنا مسئول علاقات عامة بمستشفى القوصية المركزي بأسيوط، وابني بكالوريوس تجارة، ومتجوز بقاله 3 شهور، سمع أن بدر محمد تمام ومصطفى محمد تمام طلبوا مني فلوس إتاوة، وأطلقوا عليَّ أعيرة نارية، فنزل من الكويت 19 يوليو، وعنده 25 سنة ويعمل مندوب مبيعات في الكويت، علشان يعرف بيطلبوا مني إتاوة ليه؟"
وأضاف: "إسلام قال للقاتل مفيش فلوس، فأطلق بدر عليه دفعة من الرصاص جهارًا نهارًا، وفارق الحياة، ورضيتُ بقضاء الله وقدره، وبلّغت في مركز الشرطة، ومطلوب مني دلوقتي أتنازل عن حق ابني لأنهم لم يقبضوا على هذا المجرم، وبيهددني بقتل ابني اللي شغال في الصحافة وابني المحامي، أنا أولادي عايشين في رعب، لأنه حرق عربية رئيس مباحث المركز لما عمرو بيه سليم حب يعمل حملة علشان يقبض عليه، وموّت 5 تانيين".
