«اتحدى السيجارة.. واكسب نفسك».. مبادرة شاب ثلاثينى هدفها منع التدخين، وأن يكون الوالد قدوة لطفله، يجوب بدراجته فى شوارع القاهرة وهى مكتوب عليها تلك العبارات، الأمر الذى لفت انتباه الكثيرين.
الشاب «محمود يحيى».. من محافظة البحيرة تخرج فى كلية التجارة عام ٢٠٠٩، يقول فى بداية حديثه: «الفكرة بدأت من العجلة واستمرت بها، لأنها وسيلة مواصلاتى الأساسية من ٨ سنين، وهى أسرع وسيلة أعتمد عليها عشان الزحمة، وأتجنب الزحام عن طريقها، كنت أدخن من ١٥ سنة وكنت أستعمل العجلة، وتعتبر شاهدة على كل حاجة».
«بعد ما تميت الـ٣٠ سنة الأمور كلها ابتدت تتغير، وبداية الثلاثين يعنى بداية مرحلة جديدة، ودايما كنت بسأل نفسى «أنا بقالى أد إيه بدخن؟!»، اتفاجئت لما عرفت أن بقالى ١٥ سنة بدخن، وحاولت أبطل فى الأول كان الموضوع صعبا، لكن اتحديت نفسى وبعد ما كنت مع أصحابي، قلت مش عاوز السيجارة تاني، ولما بطلت بعد ٤ شهور حسيت إنى صحيًا ونفسيًا بقيت أحسن، وقررت أعمل مبادرة عشان أساعد الشباب وأشجعهم أنهم يبطلوا تدخين».
ويتابع: «جهزت العجلة وقررت ألف بيها وأشجع الناس أنها تبطل تدخين، جبت فرام ألمونيوم وورق اللوح وكتبت الكلام بإيدي، والتكلفة كلها قليلة جدا، وبصيغ جملة صغيرة بتحمل معنى كبير وأن يكون ليها تأثير كبير، زى «أنت قدوة لطفلك لا تدخن»، بسمع ناس كتير بترددها وبحس أني عملت حاجة مفيدة، وبحاول يكون ليا دور فعال فى علاج التدخين».
واختتم: «بلاقى تشجيع من الناس وبلاقى تساؤلات فى نفس الوقت، وفرحان أنى بعمل حاجة مفيدة زى دى، وأتمنى كل الشباب يفيدوا مجتمعاتهم».
