رجل أربعينى يشعر بأن الحياة ما زالت بخير، وأن الطبيب لا يزال ملاكا للرحمة.. الدكتور محمد حقى رئيس قسم العناية المركزية ببنها، ومشرف العناية بأحد مستشفيات شبرا، سخر كل إمكاناته فى خدمة الفقراء الذين لايجدون ثمنا للكشف وليس هذا فقط، ولكن يذهب للمريض الذى ليس معه ثمن الكشف ولا حتى قيمة الموصلات للعيادة.
يقول «حقي»: «أعمل فى مهنة الطب منذ ١٥ عاما الكل خد فكرة سيئة عن الطب وكأنه تجارة فقط، وللأسف لا يعلم البعض أنها مهنة أسمى من ذلك، فكرت إزاى أساعد الناس اللى مش قادرين على العلاج ففتحت أبواب عياداتى قدامهم ببلاش من غير مقابل، ومن كام سنة فى إحدى القرى جالى تليفون بيقولى إن فى شخص نزل فى بلاعة للصرف الصحى بس بيقولوا عليه مات خلاص سارعت الزمن بسيارتى لحد ماوصلت ومستنتش إسعاف لحد ما ربنا قدرنى إنى أكون سببا فى انتشاله من موت محقق هى دى رسالة الطب الحقيقية، قررت من يومها أنى هوصل لأى مريض محتاج مساعدة بعربيتى بداية من طنطا لحد شبرا مهما بعدت المسافة».
ويتابع: «الناس بقيت محتاجة مساعدة بأى شكل مش شرط بالفلوس غلاء الأدوية واستغلال البعض للمرضى كون فكرة غير حقيقية عن كل الأطباء صحيح أن فى البعض بيستغل بس دول نسبة قليلة جدا أنا أتمنى أن الجميع يوصلى من اللى مش قادرين وكشفهم فى البيت والعيادة مجانا وكمان بعمل «فيديو» كونفرانس للناس اللى عايزه تكشف وفى أماكن بعيدة ومش عارفة توصلى أو أوصلها ودا عشان الطب دا علم ملك للجميع مش لشخص وربنا اختص البعض عشان يؤدى الرسالة».
