كلهم «مصطفى أبوحجر»... كلمة تطلقها البنات على الرجل عند حدوث أى مشكلة بينهم، وأغلب هذه المشكلات تكون بدافع الحب، كما ظهر فى فيلم «حب البنات»، ولخص المشاكل فى «اللى مش عارف يحب اللى حواليه، أو اللى مش عارف يحبب اللى حواليه فيه، أو مش عارف يحب نفسه».
ورغم أن مشكلات البنات فى الفيلم وجد لها حل، غير أن على أرض الواقع لم نصل لحل بعد، فببساطة لم يستطع حتى الآن الطرفان فهم بعضهما البعض، فأغلب الشباب هذه الفترة إما هوائى ويريد المنظر واللوك والـ best body، أو يريد أن يصبح قياديا ومسيطرا ويفرض رأيه، الأمر الذى تشعر فيه البنات بالعنصرية وكبت حريتهن، مما يتسبب فى الكثير من المشكلات.
وانقسمت الآراء على صفحات التواصل الاجتماعي، بين البنات والولاد، فتعبر البنات عن غضبها بشكل كوميدي، موضحة أن الولاد لن يختلفوا كثيرًا عن بعضهم البعض فكلهم «مصطفى أبوحجر»، على عكس الأولاد الذين عبروا عن غضبهم قائلين «وأنا مالى أنا يا لمبي».
الرجل المناسب
فالفتيات تبحث عن الرجل المناسب لهن الذى يحمل مفاتيح السعادة لقلبهن، والذى يشعرهن أن الحياة تتغير إلى الأحسن، ولكن دائمًا سوء التفاهم وعدم التغاضى عن المشكلات يتسبب فى تفاقم حجمها وصعوبة الحياة.
المشكله تتلخص فى قلة التفاهم، فيجب على الرجل أن يفهم أنه من السهل إرضاء حبيبته، وأن بوكيه الورد مش عيب، وإن التفاصيل فى حياة الست مهمة جدًا.
مناقرة على طول
ويرى خبراء النفس أن العلاقة بين البنت والولد مبنية على المناقرة الدائمة، فكل منهما يرى الموضوع من وجهة نظره، وأكبر المشكلات هى التى تبنى على الغيرة والتحكم الزائد عن حدوده من الرجل، أو إيثاره الفتاة لغضب الرجل لشعورها أنه ما زال يحبها، ويرى خبراء النفس أن العلاقة بين آدم وحواء هى علاقة ناجحة إذا أحب الطرف الأول الطرف الثانى والعكس صحيح، ولكن العلاقة الآن مبنية على استغلال الفتاة الرجل من الجانب المادي، وأن الرجل يريد الفتاة التى تحسن من منظره أمام العامة، وهذه الأمور هى أصل فشل العلاقة، فما بنى على باطل فهو باطل.
رأى البنات
وفى نهاية الأمر فالطريق إلى قلب الأنثى هو الاهتمام، والتفانى فى الحب، مع بعض الحنية الزائدة، فالبنات مؤخرًا رفعن شعار «كن لها سليما، تكن لك أمينة» كما مسلسل «حلاوة الدنيا».
وعبرت بعض الفتيات عن وجهة نظرهن فى سبب انتشار جملة « كلهم مصطفى أبوحجر: فقالت كاريمان أحمد، ٢١ سنة، إن الرجالة دايما أنانيين، عايزين إللى نفسهم فيه بس، مش بيشوفوا غيرهم من وجهة نظرهم، حبهم مبنى على الاستبداد والأوامر، البنت بالنسبة للولد لعبة حلوة بيلعب بيها ولما ماما تقوله كفاية كده أنت كبرت بيرميها، الولاد مش عايزين بنت بتفهم، هما عايزينها تافهة، غبية، وبعدين يقولولها إنتى إزاى كده، والحب الأسطورى بين البنت والولد مش موجود، مافيش ولد عنده قلب أصلًا، هما بيدوروا على إنسانة بمواصفات سكرتيرة، تنظم حياته مش أكتر»
الغيرة القاتلة
فيما قالت حنان رسلان، ٢٠ سنة، «الرجالة معظمهم لسه مقتنعين إن فى فرق بين الراجل والست، من حيث الشغل والأمر يبقى طبعًا للراجل، وفى نظرهم الراجل راجل والست ست، ولازم الرجل يكون متحكم فى كل حاجة، والست ما هى إلا أداة يحركها زى ماهو عايز، وكمان الرجالة مش عايزة تشوف الستات ناجحة وطبعًا ده بدافع الغيرة، لدرجة إنه ممكن يتحكم فى إنها تستقيل من شغلها، الراجل بيرفض فكرة أنه يرجع خطوة لورا أو أنه يفضل مكانه والست تتقدم عليه، لدرجة إنه ممكن يوصل إنه يطلقها علشان يخلص منها ومن انتصارها عليه، وأصلا الرجالة عندهم حتة نقص، ممكن تكون بسبب الماضي، أو الحاضر، أو حتى فشله لتحديد مستقبله، وبتوصل ساعات إن راجل متجوز يحس بالنقص فيدور على واحدة تانية بره وممكن المشكلة تكون فيه مش فى الست، لكن من الآخر الست مش محتاجة راجل علشان تكمل حياتها، أو تنجح علشان كلهم مصطفى أبوحجر»
صنف الرجالة
قالت دينا سيد، ٢٢ سنة، «فى العموم، صنف الرجالة صنف ناقص، وتلات أربعهم خاينين، وقلبهم يساع لكل البنات مع بعض فى نفس الوقت، ومعندهومش قدرة على مراعاة مشاعر البنت اللى معاه، يعنى ممكن يلغى وجودها ويعاكس ويرتبط ببنت تانية وهى فى حياته أباجورة عادي، الراجل لازم يعمل نفسه حمش، يعنى البنت تتعب نفسها علشان تبان جميلة، وهو يقولها إيه اللى أنتى عملاه فى نفسك، الإحساس عندهم مش موجود، ومش مهم غير نفسهم وشكلهم واسمهم، وطبعًا ممنوع الخروج من غير إذن منه علشان هو راجل، حتى لو أهلها موافقين».
