رد الفنان شريف منير على أسئلة الجمهور حول مسلسله الرمضاني الزيبق والذي شارك في بطولته مع الفنان كريم عبدالعزيز وتم عرضه في السباق الرمضاني لهذا العام.
سأل أحد الجمهور الفنان شريف منير قائلا: إن الدراما فى مسلسل الزيبق أخدت حيّز كبير على حساب الأحداث المخابراتية فى المسلسل؟ وعلى أى أساس قرر الإنتاج إن القصة تحتاج لجزئين؟
ورد الفنان شريف منير عبر تدوينة على حسابه بموقع التواصل الاجتماعي "فيس بوك" وقال: "أنا بقه عندى نفس السؤال لحضرتك، على أى أساس حضرتك قررت إن القصة مش محتاجة جزئين؟ هل حضرتك على علم بتفاصيل قصة الزيبق إللى الملخص بتاعها عند خمس أطراف فقط.. المخابرات العامة المصرية، وائل عبدالله، كريم عبدالعزيز، وليد يوسف، والعبدلله، عملية الزيبق إللى تفاصيلها أنا والأربع أطراف السالف ذكرهم عارفينها كويس، من رابع المستحيلات تتلم فى جزء واحد، وده بسبب كثرة الأحداث وسخونتها، وتم فعلًا نقاش بَيَّنَّا على الجزء الدرامى، فوجدنا بما إن العمل فى كل الأحوال لازم يخرج على جزئين، فيتعمل بالبلدى كده على نار هادية مايتسلقش، المشاهد، أنا رأييّ إن أى حد شايف إن الأحداث كان ممكن تتلم فى تلاتين حلقة لازم يكون على علم بالقصة أولًا علشان يحكم صح، وفى سبب مهم جدًا، الناس مستعجلة تدخل فى الأحداث على طول، عايزين سسبنس ومخابرات بسرعة، ونجيب من الآخر، وده فى إعتقادى حيفقد العمل عنصر التشويق، المسلسل من أول لحظة معروف إنه على جزئين، وكل حاجة كانت لازم تاخد حقها صح، تمهيدًا للسخونه إللى إن شاء الله فى الجزء التانى، اللعب حيكون سخن جدًا،.. تحياتي".
