لا يحلو شهر رمضان الكريم إلا بالزينة التى تزيده بهجة، فقبل الشهر بأيام تستعد الشوارع لتعليق زينة رمضان، وسط فرحة وبهجة من الأطفال، ولذلك التقت «البوابة» تجار الزينة الرمضانية بمنطقة الموسكي، الذين يسهمون بشكل رئيسى فى صنع الفرحة.
محمد العربي، أحد صناع وباعة الزينة فى الموسكى يقول: «أنا و3 إخوات، قررنا نشتغل فى زينة رمضان من 3 سنين تقريبًا، وابتدينا نفكر إزاى نعمل هدايا مصرية فى المناسبات زى شهر رمضان الكريم وعيد الأم وعيد الحب وغيرها من المناسبات، وابتدينا نفكر إزاى ننافس بها المنتج الاجنبى وننزلها بسعر أقل».
وأضاف: «إحنا فى رمضان السنة دى فكرنا نعمل فانوس زينة من الكرتون، وابتدينا نشتغل على الفكرة وننميها»، لافتًا إلى أن الفانوس اليدوى مكون من كرتون ويوضع فوقه قماش على شكل خيم، وكذلك زينة رمضان تكون على شكل مثلثات من الخيامية، فضلًا عن الخيامية على أشكال «بوجى وطمطم وفطوطة وعمو فؤاد»، مشيرا إلى أن ذلك النوع من الزينة عليه إقبال كبير، نظرا لاختلافه عن باقى الأنواع، وأسعاره نفس أسعار الزينة العادية.
وتابع العربي: «هدفى أن كل الشباب يشتغل ونقضى على نسبة البطالة، والشباب المفروض يستغل أى فرصة تجيلوا، ويستغل كمان فرصة عدم الاستيراد بعد ارتفاع الدولار، ويبتدى يبتكر حتى لو هياخد قرض ويعمل به مشروع صغير».
وأشارت منى، إحدى العاملات فى تصنيع زينة رمضان، إلى أنه قبل العمل يتم حساب التكلفة، قائلة: «بنحسب التكلفة قبل المواسم وبنخطط للتصميمات وبنحاول نعمل شغل نضيف بأقل سعر وبينزل السوق بسعر كويس، عشان كل الناس تقدر تشتري، وخاصة أن الأسعار نار السنة دى بعد تعويم الجنيه».
وأضافت: «الفانوس الكرتون عبارة عن شكل بس، وإحنا بنعمل له الإكسسوارات وبياخد 10 دقايق شغل، وبعد ما بيخلص بنبتدى نعرضه وبيكون شكله جذاب، وفيه إقبال كبير عليه».
وأكد محمد عثمان أحد تجار الزينة الرمضانية، أن أسعار الزينة تتراوح ما بين 10 و15 إلى 25 جنيهًا، قائلًا: «الأسعار كمان رفعت الضعف عن السنة اللى فاتت، بس الناس بتشترى عشان فرحة رمضان»، متابعًا: «كيس الزينة بيكون فيه 25 مترًا، وزاد 2 جنيه، يعنى سعره بقى 12 جنيهًا، وفيه الزينة الليزر ودى سعرها 15 جنيهًا».
