عادت علاقة مرتضى منصور، رئيس نادي الزمالك ورابطة مشجعي النادي أولتراس وايت نايتس، للتوتر من جديد، وذلك بعد قرار رئيس الزمالك أمس بمنع دخولهم مدرجات الثالثة يمين خلال مباراة كابس يونايتد على ملعب برج العرب بالبطولة الأفريقية، وهو الأمر الذي رفضته الرابطة وأعلنت رفض حضورها اللقاء.
ويتحصن رئيس نادي الزمالك بقانون الرياضة الجديد للقضاء على الرابطة وفقًا لتصريحاته واعتمادًا على بنود القانون الجديد التي تلاحق المخربين.
من جانبها وعقب منعها من التواجد بالمدرجات فقد أصدرت رابطة وايت نايتس خلال الساعات القليلة الماضية بيان عن الواقعة جاء كالتالي: النهاردة مش هنكتب بلغة عربية فصحى، ولا هنكتب مصطلحات محدش بيفهمها؛ هنخاطب الناس كلها بلغة يفهموها عشان يحسوا بكم المعاناة والأسى اللي بيعيشه جمهور الكورة كل يوم؛ ابتدت المهزلة دي بداية من قمع الجمهور ثم منعهم ثم حبسهم ثم قتلهم بدم بارد ثم هدم مدرجاتهم، وأخيرا بتقييدهم وتهديدهم وإجبارهم يقعدوا في مكان غير مكانهم.
وتابع البيان: الثالثة يمين المكان التاريخي لكل جمهور الزمالك، اللي بيجتمع فيه الغني والفقير، الشاب والعجوز والطفل، والعيلة والأم، وكل الناس بكل صفاتهم وطبقاتهم الاجتماعية بيتلاقوا هنا.
بيغنوا بصوت واحد وروح واحدة عشان حب اتربوا عليه من يوم ما اتولدوا.
وأشار: تذكرة الماتش اللي كانت بـ ٥ جنيهات وبعد كده ١٠ و٢٠ ودلوقتي بـ٥٠ جنيها، عمرها ما هتمنع شباب بيسافروا ورا فرقتهم لآخر مكان في الدنيا، وفي ظروف مايتحملهاش غيرهم هم بس.
القصة مش ثالثه ولا ثانية! الموضوع كله وتتقفل الثالثه ليه أصلا! ومين المستفيد من كده!
مش كفاية العالم كله بيلعب كل المسابقات بجمهور ويمكن ظروفهم أوحش مننا بمراحل، لكن عندهم استعداد يبنوا وينموا في الرياضة الشعبية الأولى في العالم، ده عقبالنا يعني.
وأوضح: السيد وزير الشباب والرياضة، والسيد رئيس لجنة الشباب مش جه دورهم عشان يعملوا شغلهم ويساعدوا الشباب، اللي دايما مستعد لحل مشكلة الجمهور وعودتها في أسرع وقت!
ولا الشباب دي كلمة بس كده، وهنجيب ٥-٦ تبعنا والدنيا مستقرة وزي الفل.
مش هنعيب على شخص مريض عنده مشاكل تقريبا من وهو طفل، لا يعلمها إلا الله يعني! وتبعياتها اللي خلتنا دايما في أزمات ومشاكل عشان عايز يثبت للناس إنه راجل، وكلنا عارفين اللي فيها يعني، العيب على اللي عايز يحبس ويذل ويهدد، وفي الآخر يطلع يقول شعارات عن بناء وتنمية الوطن، ودور الشباب.
الفكرة مش في المكان، الفكرة في اللي فاكرين إنهم هيحولوا المدرج سجن.
وإحنا كنا ومازلنا وسنظل خلف نادي الزمالك في أي مكان وزمان، لأن ده العهد اللي خدناه على نفسنا وعمرنا ما هننقضه؛ المدرج بتاع الجمهور.
وتعود توتر العلاقة بين مرتضى والوايت نايتس لأكثر من ثلاثة أعوام بعد منعهم من دخول التدريبات وتوترت علاقتهم أكثر بعد مذبحة الدفاع الجوي التي اتهمت الرابطة فيها رئيس الزمالك بتنفيذها.
