تعرَّض الزميلان حسن سند وميرنا عبدالرؤوف، بجريدة "البوابة نيوز"، لواقعة تعدٍّ من قِبل ملاك كافيه "شقة جاردن سيتي"، أثناء محاولة كتابة موضوع صحفي عن المكان.
وقال الزميل حسن سند: "كنا نازلين نعمل موضوع صحفي أنا وميرنا في كافيه "شقة جاردن سيتي"، وأخدنا معاد أكتر من مره منهم علشان التصوير، والمره قبل الأخيره روحنا كلمنا حد هناك بنقوله عاوزين نعمل موضوع صحفي "فيتشر"- قصة خبرية-، وكنا متفقين قبل كدا قال كلموا أصحاب المكان على صفحتهم على الإنترنت أو تعالوا لما يرجعوا من الأجازة، مشينا وروحنا يوم الثلاثاء قابلنا واحد اسمه أحمد، قالنا معنديش مشكلة تعالوا يوم الخميس الساعة 8 الصبح اشتغلوا قبل ما نفتح، يوم الخميس الصبح بقى كلمناه أكتر من مره مردّش علينا خالص، روحنا عند الكافيه واتصلنا ردّ علينا الساعه 9 وقال إحنا متفقناش على كدا أنا قولت كلموني قبلها بيوم، قولناله إحنا على الباب بره، قال مدام مكلمتونيش مفيش تصوير رنينا عليه الجرس بتاع الشقه فتح وخرج بيقول عاوزين إيه قولنا ليه: مش احترام إننا نيجي ومنعملش الشغل مع العلم إننا مش واخدين منك فلوس وأي حد صحفي هيعرف إن الفيتشرات دي بتكون دعاية للمكان وأرشيف للصحفي، المهم فِضل يتكلم بطريقة مش لطيفة، وفي الآخر شتمنا وطردنا من المكان، مع العلم إننا مغلطناش فيه"، وختم قائلًا: "الصحافة بقت مهزقة.. ملناش ضهر".
من جانبها تقدم "البوابة نيوز" بلاغًا لنقيب الصحفيين؛ لاتخاذ اللازم للحفاظ على كرامة المهنة.
