قال الإعلامي أسامة كمال، إن هناك ناسًا تبذل مجهودًا كبيرًا، وتريد أن تعمل شيئا لنفسها ولمصر، لافتًا إلى أن هناك بعض الناس يعملون على تكسير وتحطيم هؤلاء الأشخاص المجتهدين.
وأضاف كمال، في برنامجه «مساء dmc»، والمذاع عبر شاشة «dmc»، مساء اليوم الأربعاء، «لو بتكسر مقاديف غيرك مش معناه أبدًا أن سرعتك هتزيد، ناس كتير بتحاول تعطلنا من غير ما يكون لهم فائدة في العطلة، لو هتكسر مقاديف غيرك دة مش هيزود سرعتك، ولكن سيمنع عنك فايدة أنك تعرف مكانك في السبق».
وتابع «الناس التى بتكسر المقاديف أكيد بنشوفهم في كل مكان وأكيد هم اختاروا يكونوا عقبة في طريق اللي حواليهم ويكونوا الذكرى السيئة ليهم، بقالنا سنين محلك سر بسبب ناس بتكسر مقاديفنا وللا بسبب الناس مقاديفها أتكسرت وما حاولتش تعمل مقاديف غيرها أو حتى تكمل السبق عوم».
وأكمل «كمية الناس المتلبسين برشوة وفساد كبيرة ودول نقطة في بحر؟ أيوة ودة معناه إن الناس لازم تفوق لنفسها وتصحى وتعمل حاجة صح، لو سيادتك شايف الدنيا سودا وقررت تستسلم وتكعبل اللي ماستسلمش وتسودها في وشه ما تركن يا أخي يمكن التاني اللي مصرّ يعمل حاجة يوصل».
