حاول الإعلامي عمرو أديب، إقناع محمد حسن مبارك شقيق منفذ تفجير الكنيسة المرقسية بالإسكندرية، من الحديث عن جريمة شقيقه.
وقال "أديب"، خلال تقديمه برنامج "كل يوم"، المذاع علي فضائية "on-e"، اليوم الأربعاء: "أنت بتعيط ليه ده أخوك اللي فجر مش أنت.. أنت خايف من إيه وإيه اللي مزعلك فيه حد هيضايقك في البلد!!"، متابعا: "قولي أنت خايف من إيه وإحنا نساعدك ولازم نقف جنبك وأنت خايف ليه من الأشراف"، ليرد عليه شقيقه وهو يبكي: "ده أخويا وأنا كنت مفروض أربيه وأنا خايف من الأشراف يؤذوني والأشراف عائلة واحدة، وهما هيزعلوا مني علشان ده أخويا.. منك لله يا محمود.. إحنا عيلة واحدة ولو واحد انحرف كل العيلة بتقاطعه إحنا في مصيبة وأنا تعبان وهيغمى عليا ومش قادر أسمع الخبر ده".
وتابع أديب في حديثه لشقيق منفذ التفجير: "أنت مفروض تاخد بالك من بنات أخوك. ومتخافش من الأشراف.. وهو مات أنت هتدفع تمنه ليه؟؟ متخافش وإحنا لازم نقول للناس إنك ملكش ذنب.. رد عليا أنت ذنبك إيه خايف من إيه". ليرد عليه شقيق المتهم: "إحنا طالعين من ثأر وده جاي يعمل مصيبة وأنا شوفت أخويا من 4 شهور".
