ناشد الشيخ خالد الجندى، عضو مجلس الشئون الإسلامية، من علماء الأزهر الشريف، الأمام الأكبر شيخ الأزهر، التنبيه على العلماء، إنهم يفقتوا فى تخصصاتهم، متسائلا: "هل منصب عميد الكلية، علمى أم إدارى، أو ده أعلم واحد فى الكلية".
وأضاف الجندي، خلال تقديمه برنامج "لعلهم يفقهون"، المذاع على فضائية "dmc"، مساء اليوم الأحد: "هو عيب كل واحد يقول تخصصه، ويفتى فيه.. مش عيب نعمل زى الأطباء بيعلنوا عن تخصصاتهم، احترموا نفسهم فالناس احترمتهم.. لكن إحنا عندنا واحد بتاع لغة عربية بيقول محدش يفتى إلا أنا والشعراوى بس".
وتابع: "سيدة بتسأل الراجل بتاع اللغة العربية ده فى برنامج على الهواء، عن إن زوجها كان قرب يموت فقالت له قول لا إله الا الله، قال لها متقوليش الكلمة دى تانى.. فرد عليها الشيخ: إزاى تقولى له كده سيبه مينفعش نقول كده لحد بيموت".
وواصل: "بالراحة علينا يا مشايخ يا بتوع اللغة العربية.. اتركوا الفتوى لأهلها.. الراجل بيخلص نقوله إيه.. ده النبى قال لعمه أبو طالب قولها كلمة اشفع لك بها يوم القيامة".
